هترفعيه على ورق نشاف كتير بقى علشان يشرب كل الزيت اللي الباذنجان شوربه اثناء القلى وبالنسبة لى بعد الخطوة دى كمان بحطه في علبة ومعاه ورق ثاني كتير واسيبه في الثلاجة لحد ثاني يوم علشان اتخلص من اكبر كمية زيت وهتتفاجئى ان المناديل لسه بتشرب زيت طب كان مخبى كل ده فين

كل مكونات الخلطة هتحطيها على بعض وتضربيها ضربا مبرحا لحد ماكله يختفى وحتة انى بضيف مخلل مع الباذنجان دى شفتها عند واحد بتاع فول وطعمية كان بيعمل الباذنجان صينية كبيرة وبعد ربع ساعة الناس بتكون خلصت عليها

وبس ياستى احشى بقى الباذنجان وكلى واتهنى جمب صينية الفطار بتاعة يوم الجمعة اللذيذة وعلى فكرة الخلطة دى بتقدرى تحطى منها على الفول بتخليه يانهار ابيض خطير وكل ماتسيبيها في الثلاجة بتتعتق كده وتأخذ وتدى مع نفسهاوبتبقى مجرمة

في ناس لاحظت انى بحط سكر وخل في اغلب طبخاتى وواخدين على الخطوة دى احب اقولهم حاجة الاكل اذواق ومن حقى اوصل للطعم اللي بحبه غير ان فعلا التركيبة دى بتدي للاكل كله طعم زي مابيقولوا كده حاجة حلوة من غير سكر وبالهنا والشفا