بسم الله : في البول تاع البيتران حطيت الماء و الحليب والخميرة والسكر و 2 كيسان سميد و نبقى نخلط بالفوي وحد الخمس دقائق و نخليهم يخمروا شوية بعد مايطلعوا نزيدلهم الملح والزيت والسانوج والجلجلان و نزيد السميد بالتدريج حتى نتحصل على عجينة طرية انا دالي 5 كيسان و نصف على حساب نوعية السميد ونديرهم يتعجنوا حتى تولي لعجينة ملسة. نغطيها ونخليها تختمر مليح.

كي يتضاعف حجمها ندير شوية زيت في يدي و نكسرلها لخمور و نقسمها انا جاوني 3 قرصات صغار نكورهم مليح و نجيب ورق الزبدة نقطعوا مربعات ونحط فوقوا القرصات نخليهم شوية يرتاحوا ونسبطهم اكثر شوية من كسرة الرخساس. نغطيهم و نخليهم يخمروا مليح.

بالنسبة للطاجين كان تاع الطين لازم يسخن مليح وكي تجي تطيبي نقصيلوا شوية وكان تاع الفونت ديريه اقل من المتوسط بشوية و حتى تحطيه كي تجي تطيبي. كي تخمر نهزها كيما راها بورق الزبدة ونحطها فالطاجين هكا تحافظ على شكلها و ما تفسدش كي تطلع مليح نقلبها بورق الزبدة و نحيه.

نبقى نقلب فيها كل مرة على وجه حتى تطيب مليح باه ماتديرناش القشرة هديك لغليضة نزيد نطيبها على لجناب و نحيها نخليها تبرد ونقصها وبالصحة والعافية.