بسم الله : نبدأ بالعجينة في إناء نحط المارغرين و السكر والبيضة والفانيلا والزيت ونخلط مليح حتى نتحصل على خليط كريمي نزيد الفرينة بالتدريج ونلم برك مانعجنش نزيد الخميرة مع الفرينة و نلم حتى نتحصل على عجينة طرية نحطها فبلاستيك غدائي ونحطها في الثلاجة.

في كسرونة نحط السكر والنشاء و البيضة و نحرك مليح حتى يذوب شوية السكر نزيد لحليب بلعقل من الأحسن يكون شوية سخون باه يذوب السكر و نحرك و نزيد حتى نكمل لحيب نحطها على النار مع التحريك المستمر حتى تعقد نزيدلها الفانيلا و ملعقة المارغرين و نغطيها ببابي فيلم ونلسقوا لوجه الكريمة و نخليها تبرد نزيد نطلع الحليب و بودة الشانتيه ونحطها في الثلاجة.

بعد ربع ساعة نجبد العجينة نسبطها بين كيسين غدائيين بسمك 1 سم و نطبع بطابع دائري كبير شوية حسب الرغبة ونجيب مول الكب كيك نقلبوا و نحط فوق كل قالب كيسات و نحط الدائرة فوق الكيسات كيما اي مثل موضح في الصورة والى ماعندهاش المول تقدر تدير ديراكت لي كيسات برك تدير بالزوج ولا ثلاثة باه تشدلها كي تكمل تحطهم يطيبوا كي يحماروا تنحيهم وتخليهم يبردوا.

نطلع الكريم باتسيير بالباثور و نزيد الكريم شانتيه بلعقل حتى نخلطهم كامل نقسم الكريمة نصف خليتوا ابيض ونصف زدتلوا عطر الفراولة. نحط الكريمة فالبوش و نعمر لي فوندوتارت و نزينهم بالفراز بالنسبة للكريمة الوردية وبالبنان للكريمة البيضاء نذوب شوية تاع لاجولي و ندهن الفواكه باه ماتتأكسدش. نحطهم في الثلاجة و بالصحة والعافية.