بسم الله : العجينة في إناء نحط المرغرين السكر الزيت البيضة الفانيلا و نحرك باليد او بالباتور مليح حتى نتحصل على خليط كريمي نزيد الفرينة والخميرة بالتدريج حتى نتحصل على عجينة تكون طرية نلفها ببلاستيك غدائي ونحطها في الثلاجة.

كريمة الليمون في كسرونة نخلط كلش بارد في بارد الحليب السكر النشاء عصير الليمون و القشور و صفار البيضتين و نحرك مليح حتى يذوب السكر و تمتزج المكونات مع بعض نحطها فوق نار قليلة و نحرك باستمرار حتى تعقد نحيها من فوق النار نزيدلها ملعقة كبيرة مرغرين طرية و نحرك حتى تذوب مليح نغطي الكريمة ببابي فيلم و لا نبقى نحرك مرة على مرة حتى تبرد باه ماتجمدش. كان غطيتيها بابابي فيلم كي تبرد ظربيها بالباتور باه تطلق.

نزيد نطلع بياض البيض مليح مع قرصة ملح و نظيف السكر بلعقل و نطلع مليح هذي الخطوة مهمة ماتحطيش السكر على ضربة لالا بالتدريج وكل ماتزيدي شوية تطلعيه مليح باه المورانغ تاعك ينجحلك كي يولي حاكم روحوا مليح تحطيه فبوش و تحطيه في الثلاجة.

تجبدي لعجينة وتسبطيها بين كيسين بلاستيكيين بسمك 1 سم تهزيها بتلبلاستيك التحتاني وتقلبيها في المول تاعك و تسقمي الأطراف مليح تتقبيها بالفرشيطة في الوسط و تدخليها تطيب اي تستوي على حرارة 180 درجة كي تتحمر مع الأطرف زيدي شعليلها من فوق شوية و نحيها خليها تبرد و ديري طبقة الكريمة و زيدي الميرانغ بلابوش حسب الرغبة حمريها بالشاليموا كان ماعندكش شعلي الفرن من فوق و دخليها يحمر المورانغ شوية و نحيها حطيها في الثلاجة تبرد و بالصحة والعافية.

بالنسبة للقصان من الأحسن تقصيها بموس منشار باه ماتتكسرش و حتى تبرد و تطرى شوية باه تقصيها دمتم سالمين وربي يفرج علينا.