اولا في قصعة العود او الخشب نحط الدقيق ونضيفلوا الملح ونبسوا بالزيت ونلموا بالماء عادي في ما بعد نشعل الفرن على درجة 160° باه يسخن ونشد بلاطوا ونقرص العجين نتاعي ميكون خشين سمك نتاعوا ولا يكون رقيق طول يكون حوالي 2 سنتيم وندخلوا للفرن باه يطيب (يستوي) من تحت لما يحمر من جوانب نشعلوا من فوق ايضا باه يدي لون هذاك الذهبي الزين باه كي يدقدق يجيك مليح ميجيش معجن.

بهذا الشكل في ما بعد كي نخرجوه وهو سخون نبداو بعد نكسروا في مهراس النحاس ونغربلوا بالغربال تع القمح هذا

باه يجيكم مقلفع يعني ماهو رقيق ماهو خشين وكي يعود سخون متتعبوش معاه فم فم يتكسر بالخف بهذا الشكل.

في ما بعد نبدأ نفور على البخار اذن نحط الفوارة نتاعي الرفيس القسنطيني لبنات عدد الفورات نتاعوا 3

يعني 2 فورات بالحليب ومرة اخيرة بالماء الزهر.

بهذا الشكل نبداو نفروا بالحليب مرتين نحاولوا نرشوا مليح ميكون ناشف ومتتخموه بزاف بالحليب بهذا الشكل.

في ما بعد نقبض العسل والزبدة نخلطهم مع بعض ونذوبهم وهنا حسب كمية تع الرفيس نتاعك وكوبي فوق الرفيس نتاعك وضفي شوي سكر أرطب مهم ميعودش حلو ياسر ذوقي حسب وجه تحبوا درجة حلوة وميكونش ناشف ايضا.

في مابعد اقبضوا زينوه بواش موجود عندكم من مكسراات وقدموه 😘❤😍🥰 هاهو ليكم رفيس القسنطيني يشهي نتمنا يعجبكم لبنات 🙏❤