بسم الله : في إناء نحط البيض ورشة الملح و نطلعهم مليح بالباتور نزيد السكر ونطلع مليح حتى يبياض الخليط و يتضاعف الحجم تاعوا نحبس بالباتور و نزيد الفرينة والخميرة بالشوية و نخلط بملعقة بالشوية و في اتجاه واحد حتى تمتزج الفرينة مليح مع البيض نزيد الحليب والسكر والمنكه و نخلط بالشوية من تحت لفوق حتى يتخلطوا المكونات مع بعضاهم.

نوجد البلاطوا تاعي 40 / 35 نفرشوا بورق الزبدة نسخن الفرن على 180 درجة نفرغ المزيج نسويه بالملعقة مليح و ندخلوا يطيب (يستوي) مدة من 10 دقائق ل 15 دقيقة كأقصى حد. كي ينشف و يحمر شوية نحيه.

نطلع الكريم شانتيه و نحضر السوبر كريم نحط في كسرونة الماء و عصير الليمون و السكر و النشاء و المنكه و نخلطهم مليح حتى يذوب السكر والنشاء ونحطهم على نار هادئة حتى يعقد و نخليه يبرد. نحضر السيرو نخلط الماء والسكر و نحطهم على النار مع شرائح الليمون كي يغلي نحسبلوا 10 دقائق و نطفي ونخليه يبرد.

بعد ماتبرد كل المكونات نجيب سارسوا و لا بلاطوا نقص الجينواز على حسب المول تاعنا و نبدأ نشكل طبقات طبقة تاع الجينواز نسقيها مليح بالشاربات نظيف طبقة تاع الكريم شانتيه نزيد طبقة تاعةالجينواز ونسقيها مليح نزيد الكريمة و نزيد طبقة جينواز نسقيها ونزيد الطبقة الأخيرة تاع الكريمة نسويها مليح وندخلها المجمد نصف ساعة.

نجبدها من الثلاجة نفصل الكيكة عن السارسوا بواسطة الشاليموا ولا سكين و نزيد نغطي الأطرف بالكريمة ونزينهم بالكاوكاو. نحط طبقة تاع السوبر كريم على الوجه و نسويها مليح نزين الكيكة بوردات صغار تاع الكريمة و ببرش شوكولاتة السوداء درت عش صغير و بالشوكولاتة البيضاء شكلت بيضات صغار كتزيين فقط و هنا التزيين اختياري. نزيد نحطها في الثلاجة وتؤكل باردة. بالصحة والعافية