هنحط قرع العسل في حله واسعه على نار هاديه ونرش نصف كوب السكر عليه ونغطيه هينزل الماء اللي فيه ولما يشربها يبقى كده استوي كويس هنقفل عليه النار ونسيبه يهدي

نحضر البشاميل هنجيب حله على النار ونحط السمنه والدقيق ونحمره شويه بسيطه ونشيله من على النار ونجيب اللبن ونحط عليه نص كوب السكر ونقلبه كويس وممكن نزود السكر حسب الرغبه ونحطه على الدقيق ونقلب بالمضرب السلك كويس وبعدين نضيف القشطه ونقلب ونرفعه على النار مع التقليب المستمر عشان ميكلكعش اول ما يتقل نرفعه من على النار ولو احتاج لبن نزود لان عايزين القوام وسط مش تقيل ومش خفيف نسيبه يبرد

نهرس القرع العسل كويس ونحط عليه الزبيب وجوز الهند والمكسرات ورشة قرفة بسيطه ونقلب كويس ونجيب طاجن او صينيه او قالب فويل حسب الرغبه ونحط القرع العسل ونساويه

نجيب البشاميل بعد ما برد ونحط عليه البيضه ونقلبه كويس جدااا بالمضرب السلك ونوزعه على وجه القرع بحيث يغطيه وندخله تحت الشوايه ياخذ لون من فوق ونطلعه يهدي خالص ويقدم بارد وبالهنا والشفا