قبل ما نبتدي هتولعي الفرن علي اعلي درجه وتدهني صينيه مقاس ٢٦ او قالب كيك شكل زى ما تحبى كويس بالزيت وترشيها شوية كاكاو محلى زى النسكويك وتوزعيه فيها كويس. تبطنيها يعني

في الخلاط هتحطي البيض والفانيليا والخل وتضربيهم كويس جدا هتلاقي البيض ارتفع شويه في الخلاط وبقي خفيف هتضيفي اللبن والزيت وتضربي تاني وبعدين تبتدي تضيفي السكر شويه بشويه والخلاط شغال عشان يدوب كويس
هتحطى معلقة القهوه او النسكافيه وتضربي تانى كويس

هتجيبي طبق غويط وتحطي الدقيق والبيكنج بودر والكاكاو الخام وتقلبيهم كويس وتضيفي الخليط عليهم وبالمضرب السلك او الكهربا تقلبي كويس في اتجاه واحد لحد ما تلاقي الخليط بقي ناعم مفيهوش دقيق مكلكع.

تفضي الخليط في الصينيه وتدخليها الرف الوسطاني علي درجة ٢٠٠ وبعد عشر دقايق توطي علي ١٨٠ وخمس دقايق وخليها ١٦٠ وسيبيها ربع ساعه وبعدين شوفيها لو لسه ما استوتش هتسيبيها لحد ما تستوى متطلعيهاش علطول هتتطفي الفرن وتفتحي بابه نص فتحه وتسيبيها خمس دقايق وبعدين هتطلعيها تسيبيها تبرد خااااااااالص وتزينى بصوص التشوكليت وتقطعيها وتقدميها