هنجيب صنيه كبيره هنحط فيها الدقيق ونرش المياه (اللي مدوبين فيها ربع معلقه صغيره من الملح) شويه بشويه لحد ما الدقيق كله يتشرب من الماء مش عايزينه يبقى عجينه

هنجيب الكبه أو كبه الخلاط ونحط فيها الدقيق، لو الكبه صغيره نحط الدقيق على كذا مره هنحط ٣ ملاعق مياه صغيره في كل مره (حتى نحصل على قوام الرمله المبلوله)، لو كبه كبيره وهتاخد كميه الدقيق كلها هنحط ٤ ملاعق كبيرة من المياه

هننخل الدقيق في مصفاه أو منخول الدقيق الكبير أو اي حاجه اخرامها واسعه

هنجيب حله الكسكسي أو مصفاه طويله برجول ونوفق لها حله ونملا الحله مياه بس متكونش لامسه المصفاه

هنجيب شاشه الكسكسي أو أي حاجه قطن مهم جدا تكون قطن

هنحط الشاشه او الحجه القطن في المصفاة ونحط الكسكسي ونكبسه نغطيه بالشاشة، ونكبسه بغطا حله يكون حاكمه كويس

لما المياه تغلي هنحط المصفاة اللي فيها الكسكسي ومتغطية ونسيبها لمده ٤٥ دقيقه بالظبط، وضروري جدا نشيل المصفاة كل شويه ونزود مياه عشان الحله متنشفش (الخطوه ديه لو في حله عاديه)

بعد ما الوقت يعدي هنشيل القماشه من المصفاة وننخل الكسكسي ولو فيه اي حاجه مش عايزه تتنخل ياريت نرميها عشان متبوظش الكسكسي

بعدين هنجيب الشاشة بتاعت الكسكسي ونكرر الخطوات بتاعت اول مره والمره ديه هنسيب الكسكسي لمده ٢٠ ساعه

بعد ما المده تخلص ونطلع الكسكسي من القماشه مش هنحتاج اصلا ننخله تاني هتلاقيه ناعم جدا ومش معجن

هنفرد الكسكسي على صينيه ونحط عليه ٣ ملاعق من السمنه السايحه هتديه لون وطعم

وبس كده هو هيكون استوى اصلا عالبخار مش هيحتاج حاجه تاني