اول شي منغسل البرغل ومننقعه لمدة نصف ساعة بالمي منحط كاستين كبار حتى يتفتح

منحط لحمة الحشوة عالنار ومنهدي تحتا حتى تنشف ميتها ومنضيف الملح والفلفل الأسود ومنتركها لتبرد تمام

بيجي وقت لحمة العجين لازم تكون ناعمة كتير منضيف شوية ملح وكاسة مي باردة والنشا ومنحرك بإيدنا حتى تصير اللحمة نااااااعمة متل الكريما

منقسم بصلة ومنحطا فوق البرغل وملح وفلفل اسود ورشة فليفلة حمرا ومندير البرغل اول مرة بدون اللحمة

منرجع منضيف اللحمة فوق البرغل ومنعجن بإيدنا ومنرجع كمان دور منديرا على ماكينة الكبة اذا شفناها بحاجة لدور ٣ ما بيأثر

منرش شوية مي ومنعجن على ايدنا ومنقسما ٣ كرات كبار ومنحطهم بالبراد كتير ضروري مشان ماتخرب

منطالع كل كرة لحال ومنشتغل فيا

بعد ما بردت الحشوة منجيب الشحمة ومندق بصلة صغيرة مع رشة ملح وفليلفة حمرا ومنخلطهم مع بعض

منضيف الشحمة للحمة ومنضيف المكسرات المتوفرة عندكن

منبلش نكور بالكبة ونكبس ونحشي ومنغطيا بكيس نايلون مشان ماتنشف

ومنشويها عالفحم والف صحة وهنا

لاتنسو حبيباتي ندهن سيبة الشوي بالزيت ومنحط صحن في مي وشوية ملح مشان نلك ايدنا فيا قبل مانحط قرص الكبة عالمشوا

بتمنى تعجبكم ولاتنسوا تدعوا لأمي الله يردلها اخي سالم معافى