المولد النبوى بالنسبالى كان عبارة عن ان جدتى تاخدنى معاها ونروح شادر كبير ماليان حلويات من كل الالوان والاشكال ,اشي ملبن محشي عين جمل ,(ملحوظة :قلته فى الأول عشان بحبه ,عشان لو حد حابب يجبلى حلاوة المولد ماينساش الملبن المحشى من جوا عين جمل ويبقى طويل كدا فى حبل معروف ماتقلقوش هتلاقوه بسرعة وانتوا بتجبهولى.واشكال والوان بقى اللى مكسرات واللى سمسمية واللى سودانية ,كل ما لذ ولذ من الآخر,وانا ماشيه بقى فاتحة بقى ومنبهرة ومنشكحة فى نفس ذات الوقت وبرتب طبعا فى دماغى هاكل ايه وبعدين ايه وهخلص ايه انهاردة وكدا يعنى,وبعد ما جدتى كانت تشترى علبة حلاوة المولد المحترمة المليانة ,نمشى بقى لا مايصحش. انا اصلا جايا المشوار دا كله عشان عروسة المولد ,امال انتو فاكرين ايه ,وجدتى بقى تعد اطفال العيلة وكام ولد وكام بنت عشان تعرف هتجيب كام حصان وكام عروسة ,ولما نيجى للعروسة كان فى عروسة بدور واحد من الكرانيش وعروسة بدورين او تلاته كرانيش ,وبما ان انا الحفيدة الكبرى والعالم طول عمره ملىء بالعنصريه فطبعا كان بيجيلي عروسة بدورين كرانيش ,وافضل محنطة العروسة دى شهرين مثلا محدش يقدر يقربلها لحد ما علبة حلاوة لمولد تخلص تماما .تبدء بقى العروسة تزغلل فى عنى وابدء أءرقد فيها زى الفار من تحت بالتساوى عشان ماتتكسرش ,وطبعا فى الآخر بتتكسر ويبقى فرح وناكلها كلها ,والآخر نستغرب هو الشعب المصرى عنده السكر ليه؟ لا مفيش حاجه شوف كلت كام عروسة وحصان كدا ومش لازم تقولوا خليها فى سركم.مش متخيلة لو أخدت جنى اشتريلها عروسة المولد على انى افرحها والبنت المفروض تنبهر,بصراحة مش قادرة اتوقع هى ممكن تفكر فى إيه .ففكرت اننا نعمل زى مسابقه واسءلهم اسءلة خاصة بالرسول وعملنا التمر المعمر