خلطي الفرينة مع القرصة تاع الملح ولافاني والزيت والسمن و بسيهم مع بعض مليح يعني دخلي دوك السوائل بصباعك ف الفرينة من بعد جيبي بيضة و خلطيها و زيديها معاهم باش تعطينا قرمشة وتلمي بماء الزهر و ديري عجينة طرية ماشي قاسحة و خليها تريح مليح قد ما ريحت تجي ساهلة ف الخدمة

من بعد قسمي العجينة على 2 كل جزء قسميه على 6 سما 6 طبقات الفوق و6 تحت حلي الطبقة الأولى غير شوي و ديري فوقها مايزينة وحطي فوقها 2 الي كنتي حليتيها تاني ماشي تحلوهم قااع لا غي شوية و ديرو وحدة فوق وحدة وحلوهم مع بعض و تكوني طاليا السينية تاع بالسمن ديري هادوك 2 طبقات الي ولاو وحدة بعدما حليناهم وديري فوقهم السمن بالبانسو وزيدي 3 و4 حلوهم مع بعض بنفس الطريقة تاع 1و2 و حطيهم في السينية وديري فوقهم السمن بالبانسو وعاوديه نفس الطريقة السابقة

كملنا 6 طبقات نتي تكوني حمصتي الكاوكاو ولا لوز و طحنتيه وادا غادي ديري كوكاو ديري عطر اللوز الحلو زيديلها السكر ديري شوية قرفة غبرة وديريلهم ماء الزهر ما تكتريش غير ما يتشمخ شوية ماشي يولي يقطر وديريه فوق هادوك 6 طبقات

الطبقة الثانية : حلي الطبقة الأولى غير شوي وديري فوقها مايزينة وحطي فوقها طبقة 2 وخليهم مع بعض بنفس طريقة الطبقة التحتانية شاوا كي ديري السمن بيناتهم زيدي فوقه بصفاية ديري مايزينة رشات خفاف ما تكتريش حتى الطبقة التالية ما ديري والو قطعيها وديريلها اللوز وطليها بالسمن ودخليها طيب ف الفرن شعليلها م لتحت كي تشوفي الجوانب حمرو طفي وشعلي م الفوق كي تخرجيها وهي سخونة ديريلها العسل وكتري شوية وخليها تشرب