علبة الحليب المكثف المحلى نحطها فى اى إناء ارتفاعه عالى واغطيها بالمياه بكمية كبيرة,لاننا هنحطها على النار تغلى على نار هادية لمدة ساعتين ونص,وضرورى تكون متغطية بالمياه طول الوقت,فلو قلت المياه نزودها مياه مغلية,وبكدا نكون جهزنا أسهل واسرع توفى.

بسخن الفرن واخليه هادى جدا وادخل البندق لحد ما ريحته تبدء تظهر. نطفى الفرن ونسيبه لحد ما يبرد تماما وبعد كدا بدخله كيس بلاستيك واضرب عليه بكوب عشان اقسمه انصاص او ممكن ضربه بسيطه فى الكبة لان مش عايزاه قطع صغيرة انا عايزة احس بقرمشته وطعمه فى الأكل وبعد كدا نضيفه للتوفى ونقلبهم مع بعض

ندهن الصينية سمن ونفرد الكنافة فى الصينية واهم حاجة نخلى ليها جوانب ونسويها ونضغط عليها كويس جدااااااا بكوب عشان تكون متماسكة ونقدمها كتارت. نغلف التارت بورق فويل عشان لو اى سمن اتسرب والافضل نحطها فى صينية عادية عشان نحركها فى الفرن بسهولة

نسخن كريمة الحلويات لمرحلة قبل الغليان مباشرة نضيفها على الشوكولاتة ونقلب كويس جدا ونضيف الزبدة ونقلب لحد ما يمتزجوا تماما وطبعا الزبدة بتدى لون لامع للشوكولاتة واذا كان الجو برد ممكن نحتاج نقلب الخليط على حمام مائى

استخدمت كمان بتلات زهور قابلة للأكل ممكن نستخدم مكسرات او نذوب شوكولاتة بيضاء نرسم بيها او صوص كراميل طعمها لذيذ جدا بتعمل كدا موسيقى فى البؤ وانت بتاكل قرمشة الكنافة ،طعم البندق مع حلاوة التوفى ونكهة الشوكولاتة حاجة كدا تستحق التجربة

مطرح ما يسرى يمرى