એક કઢાઇમાં તલ,વરીયાળી,સૂકા ધાણાને શેકી લેવા. તેને અલગ કાઢી તે જ કઢાઇમાં મરી,તજ,લવિંગ ને પણ સરસ શેકી લેવા.તે જ રીતે શીંગદાણા શેકી લેવા. બધું ઠંડું થવા દેવું.

એક નાની વાડકી માં અડધી ભરાય તેટલું ગરમ પાણી લઇ, અડધા કલાક માટે આમલી પલાળવી. પછી તેને મિક્સર જારમાં પીસી, ગાળીને જાડો પલ્પ બનાવવો.

એક બાઉલમાં મેંદો લઇ તેમાં ઘી અને મીઠું નાખી કઠણ મુલાયમ લોટ બાંધવો. લોટ ઢીલો ના બંધાય તેનું ધ્યાન રાખવું. 1 ચમચી મેંદો અલગ કાઢી તેની સ્લરી કે લઇ બનાવવી. લોટને ઢાંકીને 15 મિનિટ માટે રેસ્ટ આપવો. પછી તેના નાની પૂરી બને તેવા 25-30 લૂઆ કરી લેવા.

એક મિક્સર જારમાં મરી,તજ,લવિંગને ઝીણા પીસવા. તેમાં તલ,વરિયાળી,ધાણા નાખી ફરી પીસવું.

પછી તેમાં જ શીંગદાણા,ખાંડ,મીઠું,લાલ મરચું,હળદર,ધાણાજીરુ,સંચળ પાઉડર,ગરમ મસાલો નાખી છેલ્લી વાર પીસી લેવું. સરસ ઝીણો ભૂકો કરવો. આ પાઉડર ને એક બાઉલમાં કાઢી લેવો.

હવે તે જ મિક્સર જારમાં સેવ અને ગાંઠીયા ને ઝીણા અધકચરા રહે તેવા પીસી લેવા. અને તેને પીસેલા મસાલામાં ઉમેરી દેવા.

એક કઢાઇમાં1 ચમચી તેલ ગરમ કરી તેમાં ચપટી હીંગ નાખી 2 ટેબલ સ્પૂન જેટલો આમલીનો પલ્પ ઉમેરવો. હલાવી ગેસ બંધ કરી બનાવેલો મસાલો તેમાં ઉમેરી બરાબર મિક્સ કરી લેવો. ઘુઘરાનો મસાલો તૈયાર છે.

એક લૂઓ લઇ પાતળી પૂરી વણી કાંટાથી પ્રીક કરવી. અડધા ભાગમાં 1 ચમચી જેટલો મસાલો મૂકી કિનારી પર થોડીક સ્લરી લગાવી પૂરી બંધ કરવી. અને કિનારી પર કાંગરી કરી લેવી. જેથી ઘુઘરો સીલ થાય અને સરસ ડિઝાઇન બને. બધા ઘુઘરા આ રીતે તૈયાર કરી લેવા.

તેલ ગરમ મૂકી બિલકુલ ધીમા તાપે ગોલ્ડન બ્રાઉન થાય ત્યાં સુધી તળી લેવા. તીખા ઘુઘરા તૈયાર છે. 8-10 દિવસ સુધી સારી રહે છે.