نوجد كل المكونات ونبدأ باسم الله، في إناء نحط البيض والسكر ورشة ملح ولفاني وبشر البرتقال (كان عندي في المجمد) نضرب الكل بالباتور (الضراب الكهربائي).

نضرّب حتى يبياض الخليط نضيف الزيت على شكل خيط حتى نكمل كل الكمية مع الخلط المستمر ونزيد قطرات من عطر الزبدة نضرب شوية حتى تتجانس كل المكونات نطفي الباطور.

نضيف النواشف (الفرينة والنشاء والخمارة نغربلهم بطبيعة الحال) حتى نتحصل على عجينة طرية وفي نفس الوقت متماسكة.
ملاحظة: في الأول نضيف 500 غ فرينة ونزيد 40 غ بالتدريج، كاين الفرينة اللي تشرب وكاين اللي ما تشربش وثاني على حساب حجم البيض.

نغطي لعجينة ونخليها ترتاح مدة نصف ساعة، نحل العجينة بين زوج بلاستيك غذائي بسمك 0.5 سم تقريبا و نطبعها بطابع دائري متوسط.
ملاحظة: نقدرو نطبعو بالطابق لكبير ذلك يبقى حسب الرغبة

نستفو الحبات في صينية فيها ورق الزبدة من الأحسن، ندهن السطح بصفار حبة بيض المخلطة مع كاكاو بني مر والقليل من الحليب وقطرات من الزيت، وندير خطوط بالفرشيطة (الشوكة) ، ندخلها للفرن المسخن مسبقا على درجة حرارة متوسطة دالي في الطياب 20 دقيقة تقريبا، كي يطيب من تحت نطفي عليه ونشعل عليه من فوق باش يدي لون موحد جميل ونطفي.
ملاحظة: نحب القاطو طايب بزاف باش يجي مقرمش أما إذا حبيتوه شوية طري نقصو شوية في مدة الطهي ويبقى ذلك على حسب فرن كل واحد.

بنفس الطريقة حتى نكمل كل الكمية، والحبات اللي يطيبو نحطهم فوق مشبك باش يبرد.
ملاحظة: هاد المقادير عطاتني 42 حبة صغيرة قطر الدائرة 6 سم.

ويقدّم بألف صحة وهنا.