اولا نخفق البيض مع السكر بخلاط كهربائي او بيتران مدة لا تقل عن 10د حتى يطلع الخليط و يبياض. نضيف الزيت لافاني و نحبس الخلاط الكهربائي نستعمل سباتول نضيف الفرينة و الخميرة يكونو منخولين على 3 دفعات يعني مانضيفش الفرينة ضربة واحدة نحط شوية نخلطها بلعقل بسباتول من فوق لتحت تدخل مليح بدون مانهبط الخليط نضيف بشوية حتى نكمل الفرينة. نجيب صينية مفروشة بورق زبدة طولها 83سم على35سم نفرغ الخليط يكون متساوي ندخلو الفرن يستوي

بعدما تطيب الجينواز تدي حوالي وقت 12د في طياب نخرجها نجيب سارسو مربع الشكل نقطع به أربعة قطع متساوية كل قطعة نشربها بواسطة بانسو بحليب مخلط معاه لافاني. نطلع كريمة الشانتيي بخلاط كهربائي نخلط بودرة شانتيي لماء بارد نحطها بثلاجة تشد شوية كما يمكن استعمالها مباشرة نحط طبقة من الكريمة على طبقة الاولى من الكيكة نقطع شوية فواكه حسب الرغبة نحطها على الكريمة و نزيد نحط طبقة الجينواز ثم طبقة الكريمة بعدها قطع الفواكه هكذا نزيد نكمل الباقيين حتى نلحق للطبقة الرابعة و الاخيرة

نغلف جميع الكيكة من الفوق و الاطراف بكريمة الشانتيي ثم نجيب الحواشي تاع الكيكة كي قطعنها بسارسو بقاو الحواشي هادوك نفتتهم نجوزهم في غربال يجي غبرة نديرو في كامل اطراف الكيكة ثم نحط الكريمة في لابوش ادوي و نزين من فوق الكيكة نعمل اطار في ساير داير

و في الوسط بعدما ندير الاطار يبقى الوسط فارغ نجيب فواكه شوية من كل نوع حسب متوفر او رغبتك بعدما نغسلها طبعا نقطعها نحطها في الوسط و ندهنها بلاجولي باش يعطيها لمعان

الافضل لو تحطو الكريمة بين الطبقات و تعلفوها بالكريمة و تخلوها ليلة كاملة بالثلاحة و بالغد تكملولها فقط التزيين من فوق هكدا تجي خير تتشرب مليح الكيكة و تجي هايلة. جميع جينوازات مليح كي يباتو