कढईमधे थोडं थोडं तूप घालून त्यावर बेसन पीठ घालून मंद आचेवर चांगला ब्राऊन रंग होईपर्यंत बेसन खमंग भाजायचं. सुरवातीला बेसनाचे खडे होतात, पण जसे खमंग भाजत राहू तसे ते खडे वितळून स्मूथ पेस्ट बनते. बेसन भाजायला जरा जास्त वेळ लागतो तरीही बेसन पीठ खमंग भाजले तरच लाडू चविला छान लागतात.

बेसन चांगले खरपूस ब्राऊन रंगाचे दिसल्यावर त्यात पाव‌ कप दूध घालून भराभर ढवळायचे. बेसनाचा रंग बदलून छान खरपूस ब्राऊन रंग येतो. भाजलेल्या बेसनामधे दूध घातल्यामुळे बेसनाचा लाडू खाताना तोंडामधे चिकटत नाही.

बेसन एकजीव झाल्यावर जेव्हा थंड होईल तेव्हा त्यात मिक्सरमधून जाडसर दळलेली पिठीसाखर घालावी. पिठीसाखर जाडसर दळल्यामुळे लाडू चिकट होत नाहीत.

भाजलेलं बेसन आणि पिठीसाखर चांगले मिक्स करुन घ्यावे. आणि त्याचे हवे त्या आकाराचे लाडू वळावे. मी लहान लहान असे बेसनाचे लाडू वळताना त्यावर काजूचा तुकडा लावला. छोटेसे मिनी बेसन लाडू छानच दिसत होते आणि खायलाही मजा आली. पहिल्या पाच लाडवांचा देवाला नैवेद्य अर्पण करुन मग सगळे लाडू वळले. आणि दिवाळीच्या फराळाचा शुभारंभ केला.