نحضر كل المكونات ونبدأ باسم الله، أول حاجة ندهن المول بالزبدة ونرشو بالفرينة ونخليه بجيه، في إناء نحط حبة البيض ورشة الملح ولفاني نضرب شوية بالفوي (المضرب اليدوي) ثم نضيف السكر مع الخلط المستمر حتى يسبح الخليط أبيض (يذوب السكر نوعا ما).
ملاحظة: الكاس اللي كيبت بيه سعته 220 ملل.

نضيف بالتدريج الزيت مع الخلط المستمر، ثم نضيف الحليب مع الخلط دائما حتى تتجانس كل المكونات، نضيف النواشف (الفرينة والخمارة) نغربلهم بطبيعة الحال.

ندخلهم بالفوي مليح نضيف مبشور نصف حبة ليمون وعطر الزبدة الخليط يجي شوية ثقيل.

في الأخير نضيف الماء يكون ساخن جدا نضيفو بالتدريج مع التحريك حتى نتحصل على قوام كريمي ومتجانس ثم نضيف حبيبات الشكولا نكون رمدتهم في شوية فرينة.

نصب الخليط في المول وندخلو للفرن المسخن مسبقا 10 د الأولى على درجة حرارة مرتفعة ثم نقص على درجة أقل من المتوسط ونخليه يطيب على خاطرو دا معايا تقريبا 45 د. كي يطيب نخليه يهدى شوية في المول مدة 5 د.
ملاحظة: كي نصب الخليط في المول نحاول نعلي يدي للفوق وانا نفرغ باش الكيك يجي مهوي.

ونقلبو على مشبك، وهو عاد دافي ندهنو بالمربى ونزينو باللوز إفلي محمص وحبيبات الشكولا ودائما التزيين يبقى حسب المتوفر.

ويقدّم بألف صحة وهنا 😋😋

يجي بزاف بنين مع كاس قهوة حليب.