نبدأ على بركة الله، نوزن الفرينة مع النشاء وكذلك الزبدة لازم يكونو بنفس الوزن، في كاسرونة نحط الزبدة (أو المرغرين) ذوب.

نضيف (الفرينة مع النشاء) ونحرك مليح حتى تتحمص الفرينة بلا ما يتغير لونها (تمد ريحة شابة) في هاذ الوقت نبدا نضيف الحليب من الأحسن يكون دافيء بالتدريج مع التحريك المستمر كل مرة نضيف شوية ونحرك.

وهكذا حتى نكمل كل كمية الحليب اللي عندي.
ملاحظة مهمة: هاذ الكريمة حشيت بيها العجينة المورقة (المونشو les manchons) عليها خليتها ثقيلة وإذا حبيبتوها خفيفة مثلا للقراتان زيدو الحليب حتى لكاس آخر يعني زوج كيسان ونصف المهم درجة الكثافة تبقى على حساب الطبق المراد تحضيره.

وفي الأخير نضيف الجبن (قطعة شاف ذوق الشيدار مع جبن المثلثات) خلطت مليح حتى انساجمت كل المكونات والفرماج ذاب تماما، ضفت الفلفل الأسود والملح حسب الذوق (الجبن راه مالح ما نديروش بزاف الملح) نخلطو الكل جيدا ثم ضفت رشة خفيفة من جوز الطيب يمكن الإستغناء عنها.
ملاحظة مهمة: ✔يمكن إضافة أنواع أخرى من الجبن ويبقى حسب المتوفر.
✔حتى الجبن يزيد يثقلها.

خلطت مليح مليح وطفيت عليها وهي عاد سخونة صفيتها بالصفاية وخليتها بجيه لحين الإستعمال.

وتستعمل بألف صحة وهنا تجي بنينة روعة 😋👌🏻