نوجد العجينة نحط في قصعة الفرينة والملح ونبسس بالسمن الذائب والبارد بعدها نلم بخليط الماء والماء الزهر ونعجن العجينة مليح حتى تولي طرية وملسة نخليها تريح ربع ساعة ونرجع ليها نقسمها إلى طناش قرصة صغيرة نغطيها ونخليها تريح على الاقل اربع ساعات.

نوجد الحشو ايضا ونخليه يريح ندير ثلاث كيلات كاوكاو ونزيد عليه السكر ونرش عليه فنجال الماء زهر منسردوش بزاف فقط نبخ عليه ونخليه بجيه.

بعدما تريح العجينة نجيب المايزينة ونحل بالقرصة في الطبقة الأولى ندير ست قرصات وبين كل قرصة نرش كمية مليحة من النشاء بعدها نبسط الطبقة الأولى حتى تولي رقيييقة جدا نحطها في البلاطو لي ذهنتو بكمية مليحة من السمن ونسويها نفرغ عليها الحشو ونزيد نوجد الطبقة الثانية درت فيها خمس قرص والسادسة خليتها باش نشكل الوردات المهم نزيد نبسط الطبقة الثانية مليح ونحطها فوق الحشو ونزيل العجينة الزايدة في الاطراف ونخليها تريح باش نقسمها ونغرس حبات الكاوكاو في كل حبة بعدها نذهنها بالسمن من فوق وندخلها طيب من تحت ساعة

ومن فوق غير تحمار نطفي عليها وبعدما نخرجها وهي سخونة نفرغ عليها العسل البارد ونخليها تتشرب ليلة كاملة ومن الأفضل يومين باش تشرب كامل العسل.