نبدأ على بركة الله، غسلت مليح الأرز بالماء بارد، حطيت كاسرونة فيها ماء ضفت عليها قطرات من الزيت والقليل من الملح كي بدا يغلي رميت فيها الأرز بعد ما خليتو يستقطر غلقت على الطنجرة وخليتو يطيب على نار متوسطة.
خليتو طاب مليح مليح حتى أصبح معجن نوعا ما، معستو بالملعقة فرغتو في إناء باش يبرد بسرعة.

في هاذ الوقت قلّيت حبة بصلة خضراء في شوية زيت حتى ذبالت وقطعت حبات الكورنيشون (الخيار الصغير المخلل) قطع صغيرة (تعطي قرمشة في هاذ الكروركات وتعتبر إضافة إختيارية).

ضفت التوابل (الفلفل الأسود، الكركم، الكمون، الثوم غبرة) ما ضفتش الملح لأنو الأرز طاب في الماء والملح، ضفت باقي المكونات (البصلة المشحرة والتونة صفيتها من الزيت والكونيشون والكزبرة والمعدنوس كانو عندي في المجمد)، خلطت المكونات مليح حتى انساجمو وشكلت كريات وحطيتهم في صينية كي كملت كل الكمية دخلت الصينية للثلاجة تقريبا 10 دقائق.

في غرفية حطيت البيض مع رشة من الفلفل الأسود ورشة من الملح، وغرفية أخرى حطيت فيها كمية من الشابلور، مررت الكريات أولا في البيض ثمّ في الشابلور يمكن إعادة هذه المرحلة مرتين (تعطيها قرمشة إضافية) كما يمكن تغليفها مرة واحدة فقط تفي بالغرض.

في مقلاة حطيت كمية قليلة من الزيت نخليها تسخن على نار متوسطة ونستف كريات الأرز في الزيت ونحاول نقلبها مرة على مرة باش تدي لون ذهبي موّحد، الحبة اللي تتقلى نحطها فوق ورق ماص.

وتقدّم بألف صحة وهنا🥰👌🏻😋.

تجي بزاف بنينة 😋ومقرمشة🍘، كنت 👈🏻حطيت من قبل وصفة أصابع الأرز بالجبن يمكن تفقد الطريقة من خلال هذا الرابط👇🏻