1/ اول شيء نحضر تتبيلة الشاورما
نجيب صدر الدجاج نقطعو شرائح خشنة.
2/ في وعاء الميكسور نحط زيت و الخل و عصير البرتقال و الليمون و نضيف التوابل و الفلفل و الثوم و طماطم المصبرة و الهريسة و الدبشة و نرحيهم بالميكسور.
3/ نحط الخليط على شرائح و نخليهم على جنب من الافضل تحضريهم مسبقا.

خبز الشاورما :
في صحن نضيف الماء و الخميرة و الزيت و السكر و الملح و نخلطهم مع بعض و نخليهم يرتاحو شوي و نضيف الفرينة و نعجن حتى نتحصل على عجينة طرية و نخليها تخمر.

كي تخمر نقسم العجينة لقرصات صغار و نخليها ترتاح 10د و نطرحهم رقيق و نحطهم يطيبو فوق طاجين المسمن على نار متوسطة و نقلب كل خطرة كي يطيبو نحطهم في منديل و نحطهم في ساشي باه ما تيبسش

بعد ما نطيب الخبز تاعي نجيب شرائح الدجاج و نحطهم يطيبو فوق الطاجين مع شوي زيت نص طياب و نحيهم نقطعهم و نرجعهم في صوص تاعهم و نعاود رجعهم يطيبو فوق الطاجين.

كي يطيبو نحيهم و نحط فوق طاحين الفلفل و البصل و الماييس و نخليهم يطيبو مع شوي زيت كي يطيبو نضيف الشاورما لي طيبتها و نخلطهم مع بعض.

نكسر لبيض و نضيفلو دبشة و نحطهم فوق الطاجين يطيبو و نحط فوقها الحشو و نحاول نغلق على الحشو حتى يطيبو و ن نقطعهم فوق الطجين و نحيهم نحطهم في صحن

نجيب الخبزات تاعي ندهنها بالمايوناز و هريسة و نحط بطاطا مقلية و الحشو و سلطة مع شرائح طماطم (درتلهم صوص) و نغلقهم.

ملاحظة : خطوة تاع البصل و البيض اختيارية بامكانك ديري غير شاورما انا شهاتني تاع لبيض و كفاه يخدم فيها شاف هشام اممممممه بنة فووور فوور جربوها من عندو و ما تندموش تهبللل.