نبدأ على بركة الله، أولا نقي العدس من الحجارة والشوائب ونغسلو مليح مليح ونحطو في إناء ونفرغ عليه الماء يكون ساخن جدا الوقت اللي نوجد فيه الخضرة، في طنجرة الضغط نحط البصلة والخضر (الجزر، اللفت والبطاطا) مبشورين، نضيف الزيت والطماطم المصبرة والتوابل (مكعب المرق جامبو، الملح حسب الذوق، الفلفلة حمرة، الفلفل أسود، الكركم، الكمون وراس الحانوت مع القليل من الفلفل الأحمر الحار اليابس).
ملاحظة مهمة: ✔الخضرة اللي استعملتها بشرتها بالغليظة.

نقلي الخضرة مليح مليح على نار هادئة، ثم نصفي العدس ونرميه فوق الخضرة ونقليه حتى هو مليح، سر البنة كلها راه في تقلية الخضرة مع العدس.

نضيف الكرافس والمعدنوس (كانو عندي في المجمد) مع فصوص الثوم نخلط ونمرق بالماء يكون غالي جدا وما نكثرش بزاف باش ما يجيش ميّه نغلق على طنجرة الضغط ونخيها تصفر على نار متوسطة تقريبا من 20 حتى 30 دقيقة يوجد، نحل عليه نصيبو طايب زبدة نضيف رشة صغيرة من الكمون ونطفي عليه.

ويقدّم بألـف صحة وهنا 👌🏻😋👌🏻