في قصعة نحط زوج كيلات سميد عادي مع نص كيلة فرينة ونملحو عادي كيما نملحو الكسرة
نضيفو عليهم كلية نتاع ليدام متكونة من كيلة غير ربع سمن مع زبدة والربع اللي بقا نكملوه بالزيت ونبسسو لعجين ملييييح ونخلوه يرتاح نا خليتو ساعة

من جهة نجيبو كمية نتاع غرس منقي ومعجون الكمية تعادل نص كمية السميد تقريبا
نضيفولها مغرف صغيرة قرفة ونعجنوها بالماء كي تتعجن نزيدو مغرف زيت ولا زوج مغارف وتكون طرية

بعدما ركحت لعجينة نتاعنا نلموها بالحليب ونخليوها شوي مبلولة لأنو السميد رايح يشرب نقسمها على زوج كرات نفتح القسم الاول مربع ونزيد نفتح الغرس مربع قل من لعجين بشوي ونعدلو فوقو ونزيد نفتح النص الثاني على بلاستيك اخر ونحطو من فوق ونعدل لعجين مليح باه يغطي كامل الغرس ونفتحو لعجين بين پلاستيك حتان يجينا مربع مايفوتش واحد سنتيمتر ونبداو نطبعو بالطابع ولا بالسكين
كي نفتحوهم نعدلو الحبات بيدينا باه يكون شكلهم مليح ونطيبوهم في طاجين الشخشوخة نكونو حطينا تحتو طاجين نتاع الطين باه مايتحرقلناش

النار تكون متوسطة وبالصحة والعافية