نبشر البصل في الكبة او بالمبشرة ونعصره كويس جداً في مصفي وناخد الماء دي في طبق ونتبلها بملح وفلفل اسود ومعلقة زيت ونركنها على جنب

بعدين نأخذ البصل المعصور دا ونضيفه على اللحمة مع البقدونس المفروم واللية المبشورة ونخلطهم كويس جداً

هنضيف التوابل بتاعتنا والبيكنج باودر على عجينة الكفتة ربع ملعقة صغيرة فلفل اسود ونص ملعقة صغيرة بهارات لحمة ورشة صغيرة من القرفة والملح حسب الرغبة بس خلي بالك ان الكفتة بعد ما بتستوي ملحها بيزيد في منزودش ملح كتير

اهم خطوة بقي اننا نفضل نعجن في الكفتة كتير لحد ما تبقي كلها متجانسة وتبتدي تكون خيوط عشان متفكش منك في التسوية

بعد ما عجنا الكفتة كويس هنسيبها اقل حاجة ساعتين في الثلاجة والافضل تعمليها من قبلها بيوم عشان تشرب التتبيلة كويس وتديكي نتيجة مضمونة

هنجيب سيخ مدهون زيت او اي قلم طويل او حتى يد المعلقة اي حاجة نصبع عليها الكفتة المهم تكون مدهونة زيت وناخد كورة قد حجم البيضة ونصبعها على السيخ ونضغط عليها كويس وبعدين نبل ايدينا بمية البصل اللي شيلناها على جنب ونضغط تاني على الكفتة عشان نضمن انها تكون قطعة واحدة ومتفكش وكمان متنشفش منك وبعدين هتسحبيها بالراحة من على السيخ وترصيها في صينية مدهونة زيت

بعد ما نخلص الكمية كلها ونرصها في الصينية هندخلها فرن على حرارة متوسطة لحد ما تستوي وتأخذ لون من تحت وبعدين نولع الشواية لحد ما تأخذ لون كمان من فوق

في طريقة تانية للتسوية على الجريل هندهن الجريل زيت ونسخنها كويس اوي وبعدين ننزل الكفتة على نار عالية تأخذ تحميرة من تحت بعدين نقلبها ونغطي الجريل ونخفف النار لحد ما تستوي وتأخذ لون من الناحية الثانية

وبعدين تتقدم على طبق مفروش بقدونس وجنبها سلطة طحينة وممكن تتقدم مع ارز مبهر او عيش زي ما تحبو

لو حابين بقي تدوها الطعم المدخن الحلو بتاع المطاعم هنجيب فحمة صغيرة نولها لحد ما تبقي حمرا خالص ونحط طبق فويل صغير في وسط الصينية وفيه زيت ونحط جواه الفحمة ونغطي الصينية كويس ونسيبها ١٠ دقائق تأخذ ريحة الفحم وهتاكلي احلى كفتة مشوية على الفحم في بيتك