نجهز الحشوة هنجيب طاسة نحط فيها معلقة سمنه تسيح ننزل عليها ببصلاية مبشورة تصفر ننزل عليها بالقوانص متقطعه صغير واشوح لحد البصلاية ما تبقي بني فاتح انزل بالكبدة المتقطعه واشوح مع رشة فلفل اسمر واقلب تاخد لون أصفي الأرز واحطه معاهم واقلب واتبل ملح وفلفل اسمر وبهارات وقرفة وجوزة الطيب رشة من كل نوع واقلب واحط نصف كوب ماء مغلي واغطي واسيبه يستوي نصف تسويه علي نار هاديه وبعدين اسيبه يبرد قبل ما أحشي بيه

هبدأ أحشي الحمام ما بين الجلد واللحم ومن عند الرقبة واقفلها بخلة خشب واكتفه من رجليه واخيط من تحت المهم مكبسش الارز علشان لسه هيستوي ويذيد فنعمل حساب كده وبعدين تسلقه في ماء بتغلي بها بصلايه مقطعه اربعه وطماطماية ولورا وحبهان ورشة فلفل اسمر غلوة واحدة واهدي النار خالص يستوي براحته زي ما بتسوي الارز علشان ميفرقعش

بعد التسويه بياخد حوالي ٤٠ دقيقة اشيله من الشوربة يتصفي خالص واحمره في معلقة سمنه ومعلقة زيت او ادهنه مادة دهنيه حسب الرغبة وادخله الفرن ياخد لون من تحت ومن فوق وبالهنا والشفا