प्रथम सारणासाठी : कढईत तुपावर खसखस भाजली की त्यात गुळ टाका, गुळ विरघळला की ओले खोबरे खवलेले टाकून परता. सारण थोडं सुक झालं की गॅस बंद करून त्यात वेलची पूड घाला, मी थोडं जायफळ किसून ही घातलं. हे झालं सारण तयार.

पारीसाठी : भांड्यात पाणी, मीठ, तूप, साखर घालून उकळी काढा. (मी अर्धा कप पाणी आणि अर्धा कप दूध घातले) उकळी आली की त्यात तांदळाचे पीठ चाळलेले घालुन काविलत्याच्या पाठच्या टोकाने पटापट ढवळायचे, छान एकजीव झाले की गॅस बंद करून झाकण ठेवून ५-१० मिनिटे ठेवायचे.

नंतर परातीत अर्धी उकड काढून घेऊन ती पेल्याने दाबुन गुठळ्या मोडून घ्यायच्या, नंतर हाताला तूप लावून छान मऊसर मळून घ्यायचे. अशीच राहिलेली उकड ही मळून घ्यायची व झाकुन ठेवायची. त्याचे छोटे छोटे गोळे करून घ्यायचे.

एकेक गोळा घेऊन प्लास्टिक पेपरवर तूप लावून ताटाने दाबून पारी बनवायची आणि सारण भरून मोदक वळायचे. असे सर्व मोदक तयार करून घ्यायचे. (मोदक करून झाकून ठेवायचे नाहीतर सुकतात)