نبدأ باسم الله، نغسل الطعام جيدا بالماء بارد (هذا الطعام مفتول باليد) نميل القصعة ونخليه ينشف مليح مليح من الماء، كي ينشف نفتتو بين يدي ونزيد 2 ملاعق كبار زيت ندخل هاد الزيت مليح.

نعمر الكسكاس ونديرو يفور التفويرة الأولى، كي يفور نقلبو في القصعة نحلو ونرشو بالماء بالتدريج ونضيف الملح نخلطو مليح ونخليه يشرب، هاد العملية نقوم بيها 3 مرات.

كي نفور التفويرة الثانية نوجد الروا في كاسرونة ندير فيها كمية من الماء والملح ونحطها فوق النار تغلي كي تغلي نرمي فيها البطاطا واللفت ونخليها طيب نص طياب من بعد نضيف عليها قطع من الكابوية الحمرا وحوالي غرفية من الفول الأخضر كنت فورتو من قبل نخلي الخضرة طيب و تنقص شوية من الماء.
ملاحظة مهمة: ✔تقدرو ديرو الخضرة في نفس القدرة اللي تفورو فيها تجي بنينة كثر.

وفي هاذ الوقت نكون فورت التفويرة الثالثة نحلها بين يدي ونبردها شوية نضيف دهان الحر (دهان لعرب) وإذا مكانش حاضر ندير سمن المرجان ندهنو مليح ونبردو.

كي طيب الخضرة وتوجد نضيف عليها الحليب نكون حليت فيه حليب بودرة باش يجي عاقد ورشة خفيفة على راس الملعقة الصغيرة فلفل أسود (إضافة إختيارية).

نخليه يغلي ونحضيه باش ما يفيضش، وها هو واجد، نعمر الصحن بالطعام ونسقي بالحليب مع الخضرة.

وقدّمتو بألـف صحـة وهنـا👌🏻😋👌🏻.