نبدا بسم اللع ونجيب نصف صدر دجاج نقطعو مربعات ونجيب الاشوار نحط فيها الدجاج وحبة بصل صغيرة مقطعة وكمية قليلة من الشحمة و2فص ثوم وملح وتوابل دجاج وفلفل اسود وبابريكا حلوة

نرحي الخليط مليح ثم نضيف علبة يارورت طبيعي ونعاود نرحي مليح

بعد مارحيت الخليط مرتين اصبح ناعم نغطيه بورق شفاف ونخليه يرتاح ثم نجيب ورق طهي

ندهن ورق الطهي بالزيت ونحط كمية من اللحم ونحط ورق طهي آخر فوقو ونحل بالحلال ونشكل حربوش كما فالصورة

نكمل كامل اللحم بنفس الطريقة ونحط حبة فلفل وحبة طماطم ونشعل الفرن يسخن مليح وندخل الكباب يطيب ثم نرجع نجيب الاشوار ونحط فيها 2كاس سميد ناعم او متوسط ونحط م ك خميرة الخبز وم ك سكر ونضيف 2كاس الا ربع ماء دافئ ونغلق الاشوار ونرحي الكل مليح

نفرغ خليط السميد في رسبسيون ونضيف فالاول كاس فرينة ونبدا نلم العجينة ثم نضيف الثاني ونعجن وم ص ملح

نلم العجينة ونخليها تختمر مليح ثم نرجع بعد ما اختمرت ونقطعها الى 7 قطع

نشكل العجينة الى كرات ونغطيها بطرشونة مدة 10 د

نرجع نخبز كرات العجينة كنا فالصورة ونغطيها ونخليها مدة 10د ثم نبدا نطيب مباشرة في طاجين الطين او طاجين حديد على نار فوق المتوسطة

نبقا نقلب من الجهتين حتى نطيب كامل الخبيزات ونرجع نطيب كريمة الجبن في كسرونة نحط كاس حليب مع م ك نشاء ورشة فلفل اسود ورشة كركم ونحطها عالنار ونبقا نخلط حتى تثقال

نطفي ونضيف 2م ك جبن طري وجبن مبشور ونخلط مليح ثم نرحيها بالبرا ميكسار مليح ونحطها على جنب نرجع لدونر كباب بعد ماطاب ننزع ورق الطهي ونفتتو في صحن

بعد ذلك نجيب نحضر ميني مطلوع ونحشيه بدونر كباب نفتح حبة الميني مطلوع ونحط م ك كريمة الجبن

ثم نحط كمية من الكباب وقطع من الطماطم المشوية وكذلك إضافة من عندي شفت بطاطا مقلية ثم حطيت من فوق كريمة الجبن وغلقت حبة الميني مطلوع هكا حتى كملت كامل الخبيزات

فالاخير حطيتهم في صحن التقديم وقدمتهم مع حساء الخضار

فعلا وصفة الدونر الكباب التركي لي عملت ضجة في مواقع التواصل الاجتماعي تستاهل التجربة