نبدا بسم الله ونجيب رسبسيون نحط فيه كاس حليب دافئ ونضيف عليه ربع كاس زيت ونخلط ثم نحط م ك خميرة الخبز وم ك سكر ونخلط مليح

ثم نضيف بياض حبة بيض ونخلط ونبدا نضيف فالطحين القمح الكامل بالكأس وم ص ملح ونصف كيس خميرة الحلوى

نبقا نلم حتى نتحصل على عجينة متماسكة طرية نوعا ما ونغطيها بورق شفاف ونخليها تختمر ونرجع نحضر الحشو نجيب مقلاة نحط فيها 2م م زيت ونحطها عالنار ونضيف حبة بصل صغيرة مقطعة رقيقة

بعد ماتقلى البصل مليح نضيف عليه الدجاج ونضيف الملح والكاري والفلفل الاسود وراس الحانوت و2فص ثوم مرحي ونخلط مليح

نبقا نحل فالدجاج حتى يطيب مليح ونضيفلو بقدونس مقطع مع م ص جدا هريسة حارة ونطفي النار عالحشو ونخليه يبرد تماما ونرجع العجينة ونهبطلها الخمور ونشكلها حربوش

نقطعها الى 8 كرات متساوية ونرجع نحضر الجبن المبشور والحشو وحبات زيتون اسود وحبات جبن مثلثات ونرجع نرش سطح العمل بالفرينة ونحل الكرة الاولى

نحط كمية من الحشو ثم كمية مليحة من جبن مبشور ثم قطع من جبن مثلثات ونبدا نغلق فالعجينة كما موضح فالصورة ونشكلها رزمة تغلقها مليح ونرشو طحين فالسينية ونحط المملحات في سينة فرن رشيتها بالطحين ونخليهم يختمرو مرة أخرى

نرجع نحط صغار البيض مع القليل من الحليب وندهن الحبات مليح ونزينهم بحبات زيتون اسود ونشعل الفرن يسخن مسبقا وندخل السينية الاولى تطيب من تحت ثم نشعل لها من فوق تتحمر مليح

فالاخير نحطهم في صحن التقديم حضرتهم للعشاء مع حساء الخضار

شكل مملحات الرزمة جاو هايلين وطحين صحي احسن من الطحين الابيض