نبدأ بسم الله ونجيب رسبسيون نحط فيها 250غ زبدة مع صغار بيضة وبيضة كاملة و3م ك سكر ناعم وم ك كاكاو وم ك شوكولاتة الطلي بني ونخلط بالخلاط الكهربائي ثم نضيف 2م ك قطايف محمصة و2م ك كاوكاو (فول سوداني) محمص ومرحي رقيق

نخلط جيداً ثم نبدأ نضيف في الفرينة تدريجيا مع ما ص خميرة الحلوى

نلم العجينة ونخليها ترتاح نصف ساعة ثم نجيب طابع شكل بيضوي حاد ونحل العجينة فوق بلاستيك غذائي ونطلع العجينة

نحط الحبات في صينية فرن حتى نكمل كامل الكمية ونشعل الفرن يسخن وندخلو يطيب من تحت ثم نشعلو من فوق قليلا ونخرجو يبرد

نشكل الحشو نجيب رسبسيون نحط فيه كمية من توفيا كراميل وكمية من شمية(حلوة الترك) ونخلط جيداً ثم نضيف كمية من الكاوكاو محمص ومرحي

نخلط الكل جيداً حتى نتحصل على حشو نبدأ نحط كمية من الحشو في حبة الحلوى ونغلق بحبة أخرى

نكمل كامل الحبات ونخليهم على جنب

نذوب 100غ شوكولاتة بالحليب على حمام مائي ونغلف حبات الحلوى ونخليها تجف

نجيب عجينة السكر نفتحها بالحلال ونطبعها بطابع لي في الصورة

نقطع الحبات جيداً ونقص كل شكل على 2وونلصقهم باستعمال قليل من الشوكولاتة ونخليهم يلصقو تماما

نجيب ملون غذائ ذهبي نضيفلو قليل من الزيت ونشكل شكل شمس كما في الصورة ونحط اشكال عيد سعيد (يفضل إستعمال عجينة السكر صفراء راح تتحصلو على شكل رائع)

فالاخير نحط حبات الحلوى في كيسات ورقية وكان هذا 3حلوى لعيد الفطر