في قصعة نحط كيلة سمن والسميد والملح وملعقة صغيرة سكر ونمزجهم ونحبكهم جيداً بالأيدي حتى تتشرب كل حبيبات السميد كمية الدهن وكي نشكل كرة تتشكل ماتتحلش ثم نتوقف ونحطها في علبة محكمة الإغلاق ونحتفظ بها ليلة كاملة في مكان بارد وجاف وفي الصيف نحطها في اسفل الثلاجة

نحط في صحن التمر المعجون والقرفة والقرنفل المطحون ونضيف 2ملاعق كبيرة زيت ونضيف ماء زهر 🌼ونعجنها جيداً حتى تصبح طرية

في قصعة نحط كمية من مزيج السميد والسمن ونضيفلها كمية من الماء والماء الزهر الدافئ ونحاول نجمعها بأطراف الأصابع بدون عجنها ونشكلها كرة ونتركها جانبا

نكرر نفس العملية حتى نشكل 3كرات ونرجع للكرة الأولى ونحاول نفتتها ونتأكد من أنو دات حقها من الماء وإلا كان ناقصها نضيفلها الماء ونحطها في طاولة العمل ونشكل حربوش كبير وبواسطة الأصابع نشكل حفرة على طول الحربوش ونفس الشيء للتمر نحط حربوش في الحفرة لي شكلناها ونغلق عليه

ونعود للحربوش الثاني ونكرر نفس الخطوات

ونرجع للحربوش الأول لي يكون تشرب جيداً كل كمية الماء ونقطعو لنصفين وناخذ النصف الأول ونحاول نضغط عليه حتى نخرج كل كمية الهواء حتى يسهل تشكيله ونرقو قليلا ثم بواسطة طابع المقرود نطبع الحربوش ونضغط قليلا حتى يأخذ الحربوش شكل مقرودات مزينة ونحاول نتخلص من الزائد من العجين ونقطع مقروطات ونحطهم في بلاطو

ونكرر الخطوات حتى نكمل كل كمية العجينة ثم نتركهم يرتاحو على الأقل ساعتين ثم ندخلهم للفرن مسخن مسبقا على درجة 180درجة ونتركها تاخذ لون من أسفل ثم نشعل عليها النار ونتركها تاخذ لون على الوجه ونخرجو ونتركهم يبردو جيداً

ثم نحتفظ به وقبل التقديم يتعسل

طريقة تعسال المقروط. نضع العسل في كاسرول ونضيف عليه القليل من ماء زهر 🌼ويترك حتى يسخن المزيج ثم نطفئ النار ونحط المقروط ونتركو فقط دقيقة ونخرجو ونحطو في كسكاس يستقطر ويزين بالجلجلان المحمص ويقدم في ليكيسات الخاصين بالمقروط

لبنات أنا كانو خلاصولي الكيسات الخاصين بالمقروط بصح حبيت نصورلكم، هههه 😂

طريقة تجهيز التمر المعجون👆 في البيت في هاذا الرابط

وشهية طيبة وصح عيدكم 🎈🎉🎊