نبدأ بسم الله ونجيب 2رسبسيون و4حبات بيض بحرارة الغرفة ونفصل الصغار عن البياض

نضيف رشة ملح و3م ك سكر عالبياض ونخفق حتى نتحصل على خليط ثقيل ونرجع لصفار نضيف رشة ملح و3م ك سكر ونخلط جيداً

نضيف بعد ذلك 6م ك زيت ونواصل الخفق ثم 4م ك حليب دافئ ونواصل الخفق جيداً

بعد ماتحصلت على خليط نضيف 6م ك فرينة ونخلط جيداً ونضيف قطرات من عطر جوز الهند

نجيب صينية فرن نحط فيها ورق الطهي ونفرغ خليط الكيك فيه ويكون الفرن مسخن مسبقا ندخل الكيك يطيب من أسفل مدة 10 دقائق ونطفي ونشعل عليه من فوق يتحمر ونخرجو

نجيب ورق طهي أخرى ونقلب الكيك ثم ننزع الورقة

نرجع نقلب ورقة الكيك على الوجه الاول ثم نغطيها بطرشونة ونخليها تبرد تماما

نرجع نحضر فوراج الفراولة نجيب كسرونة نحط فيها حوالى 10حبات فراولة مقطعة مربعات صغير. و2م ك سكر ونخليهم على جنب حتى يذوب السكر تماما ثم نرجع نحطهم على نار هادئة ونرجع نطلع كريم شانتيه في ريسبسيون نحط كاس شانتيه مع كاس ماء وتخفق جيداً ونضيفلها قطرات من عطر جوز الهند

نترك الشانتيه على جنب ونرجع نرحي فوراج الفراولة في أشوار صغير ثم نرجع الورقة البسكويت نحط حوالى 3م ك من الشانتيه

نفتح الشانتيه مليح على كامل ورقة البسكويت ثم نفرغ كمية الفوراج على سطح الشانتيه ثم نفتح بالملعقة ونرش كمية من جوز الهند فوق الفراولة

نرجع نلف ورقة الكيك بورق الطهي وندخلها المجمد حوالى نصف ساعة بعد ذلك نخرجها من المجمد وننزع ورق الطهي ثم نحطها فوق ظهر الصينية

نطلي سطح الكيك بكمية من الشانتيه ونسويها جيداً بالسباتيلا ثم نشكل روزسات للتزيين

نزين بعد ذلك بانصاف حبات فراولة ثم لوز ايفيليه محمص عالجوانب ثم نحط سويسرول في صحن التقديم ودهنت انصاف الفراولة بلاجولي حتى نتحصل على اللمعان

فالاخير شكل سويسرول الفراولة وجوز الهند جاء روعة طعم وذوق يقدم مع شاي او عصير