نبدا بسم الله نجيب ريسبيون نحط فيه 400غ طحين مع 90غ زبدة بحرارة المطبخ مع علبة زبادي ونضيف حبة بيض صغيرة الحجم ونخلط المكونات جيدا ونضيف م ص ملح وم ص خميرة الحلويات ونبدا نلمها بحوالي كاس حليب بارد

نتحصل على عجينة طرية نوعا ما ونغطيها ونخليها تختمر

نرجع نحضر الحشو نقطع نصف صدر دجاج إلى قطع صغيرة الحجم ثم نحط في مقلاة القليل من الزيت ونحطها عالنار ثم نضيف الدجاج يتقلى مع القليل من الملح وم ص توابل دجاج

بعد ما تقلى جيدا نفرغو في صحن ونرجع نقطع حبة بصل صغيرة وحبة فلفل حلو وحار إلى قطع صغيرة

نضيف في نفس المقلاة البصل والفلفل وعلى نار هادئة نقليهم جيدا ثم نضيف زيتون اخضر شرائح مع ملح وفلفل اسود ونقلي جيدا حتى يذبل البصل والفلفل ثم نضيف الدجاج ونخليهم يطيبو مع بعض

نضيف جبن طري عالخليط ثم ربع كاس كريمة سائلة ونخليها تغلي

نطفي النار عالحشو ونخليه يبرد تماما ثم نرجع العجينة نحلها حربوش ونقطعها إلى 5كرات

نحطهم في صحن نحتفظ لكرة واحدة ونخدم باربع كرات نبدا نحل الكرة الاولى على طاولة العمل رقيقة

نجيب صحن دائري صغير (شربة) نحط فيه العجينة كما فالصورة ونحط كمية مليحة من الجبن المبشور ثم كمية من الحشو

نضيف جبن طري وطبقة أخرى من جبن مبشور ونغلق العجينة حتى نتحصل على دائرة ونقطع العجينة الزائدة ونكمل كامل المرات بنفس الطريقة نحطهم فوق ورق طهي في سينية فرن ثم نرجع للكرة الاخيرة ونشكل حربوش رقيق نقسمو على 2ونشكل ضفيرة لكل مملحة ونحط كل ضفيرة فوق كل دائرة كما هو موضح فالصورة

اما باقي العجينة نشكلها كرات صغيرة نضعها من فوق فالوسط ثم ندهن حبات المملحات بصفار البيض ونزين حواف الحبات بزيتون شرائح ونشعل الفرن يسخن

ندخل حبات المملحات يطيبو من تحت ثم نشعل عليه من فوق يتحمرو جيدا

فالاخير شكل المملحات الروسية جاو بزاف هايلين قدمتهم مع بطاطا مقلية ونفتح كل حبة كما فالصورة