العجينة: نخلط الدقيق و الماية و الملح مع بعض لحد ما يبقوا عجينة ناعمة و نحطها في التلاجة لمدة ساعة

نجيب الزبدة و نقطعها شرايح و نرش عيها شوية دقيق و نخلطها بسرعة قبل ما تسيح نطلع العجينة و نفردها على مكان نضيف و عليه دقيق على شكل مستطيل و نشكل الزبدة نفس حجم المستطيل و نقفل العجينة عليها على شكل ظرف و نفردها و نتنيها من النص و نحطها في التلاجة لمدة نص ساعه

بعدين نتنيها من النص و نفردها ٦ مرات و نسخن الفرن على ١٨٠° و نحط العجينة في صينية مبلولة و نخرمها بالشوكة و نسيبها في الفرن لحد ما تستوي

الكريمة.. نسخن اللبن و نضرب البيض و النشا و السكر و الفانيليا و نضيف اللبن عليهم و نضربهم كويس و بعدين نحطهم في المكان اللي سخنتا فيه اللبن تاني و نحطهم على النار لحد مايتقلوا اول ما يتقلوا نحط الزبدة عليهم و نقلب كويس و نحطها في طبق و نغطيها لحد ما تبرد

لما العجينة تستوي نقطعها قطع متساوية و بعدين نمسك كل اتنين او تلاتة حسب الرغبة و نحط مابينهم الكريمة و على الوش الشيكولاتة او السكر ،، ممكن بدل الكريمة مربى او عسل

بالنسبة ل الشيكولاتة الخام بنخطها في طبق مع شوية زبدة او سمنة عشان يدوها لمعة و تحتيهم حلة او طبق فيها ماية مغلية و نفضل نقلب

نصايح لعجينة البف باستري : ١، ماينفعش بعد ما نضيف الزبدة نسيب العجينة برا التلاجة عشان الزبدة ماتسحش و الطبقات تلزق في بعض ، ٢،ماندهنش الصينية اللي هنخبز فيها العجينة ، ٣، لازم الصينية تكون مغسولة كويس ٤،نظبط الفرن على ١٨٠° :٢٠٠° ولازم يكون متسخن قبل ما الصينية تتحط ٥، ماتنسوش تعملوا لايك وكومنت