نضع الدقيق فى طبق غويط بس ياريت يكون نوع الدقيق ممتاز ويكون مخصص للفطير يعنى دقيق بيعمل عرق نحط عليه شويه ملح صفيرين بس علشان الطعم.

بعد كدا نبتدى ننزل بالماء واحده واحده ونعجن لحد ما تبقى معايا عجينه طريه وما بتلزقش نسبها ترتاح فى طبق مرشوش بالدقيق حوالى ساعه.

بعد كدا نبتدى نقطعها كور حسب حجم الفطيره المطلوبه يعنى لو فطيره صغيره تبقى كوره متوسطه ولو اكبر يبقى عجين اكتر وبعد كدا نرش على الرخامه دقيق ونفرد الاول بالنشابه لحد ما تبقى دايره رفيعه.

نبتدى الفرد بالايد وتشد من كل جانب بالراحة ومن النص نمط فى العجينه لحد اما تبقى شفافه. نكون مجهزين فى طاسه السمنه والزيت على بعض وتكون السمنه سايحه.

نبتدى نرش عل الدايره اللى عندى يعنى على وش العجينه وهى مفروده وتوزع عليها السمنه مع الزيت إلى عندى بعد كدا نطبقها بالنصف ونرش تانى على الوجه اللى قدامى ونطبق تانى ونرش بردو ونوزع بأيدينا على العجينه.

بعد كدا نطبق تانى يعن من كل جنب نطبق بالنصف لحد اما تبقى مستطيله ومع كل تطبيق نحط السمنه وبعد كدا نلف المستطيل ده رول بعد ما ندهنه وندخل الطرف الأول فى الطرف الاخيرونخليها قدامي كدا زى الكوره.

نعمل كل العجين عندى بنفس الطريقه ونسيبه يستريح تانى حوالى ربع ساعه.

نسخن الفرن بس على أقل درجه حراره عندى علشان يستوى كويس من جوه.

ندهن الصينيه بالسمنه والزيت بتوعى اللى بشتغل بيهم ونحط الفطيره على الرخامه ونبتدى نفرد ببطن الايد واحده واحده من كل جنب لحد اما تعمل دايره الفطيره وما نخلهاش رفيعه ونحطها فى الصينيه المدهونه.

ندخلها الفرن على الصاج من تحت ونتابعها لحد اما تاخد لون ذهبى من الوجه اللى تحت نقوم قلبنها على الوجه التانى تاخد نفس اللون وبعد كدا نطلعها وهكذا كل الفطير اللى مجهزاه وكل اما احط واحده أحطلها سمنه فى الصينيه علشان تستوى وتاخد لون وبالف هنا وشفا.