بتنقعي الرز وبتغسلي الدجاج بالماء والملح والخل.

بتقطعي بصله جنحان رفيعه والبصله التانيه مكعبات زي السلطه.

بتقطعي الفليفله والثوم مكعبات.

بالخلاط : بتخلطي البصله اللي قطعتيها مكعبات مع الفليفله والثوم ونص كميه البهارات, البابريكا والكاري وبهارات الكبسه وبهارات السبعه, والخل وزيت المازولا والماجي والفلفل الاسود والملح ومعجون البندوره, لحد ما يصيرو صوص.

البصله الجنحان, بتشوحيها بزيت زيتون على النار, لحد ما يتصير ذهبيه. بعدين بتحطي الجزر عليها وبتحطي باقي البهارات وبتحركي لحتى يتذبلو ويتنكهو.

بتضيفي نص كميه الصوص او ثلث ارباعها وبتخليها خمس دقايق لحد ما يتخلط مع البصل والجزر.

بعدين بتضيفي الرز وبتصيري تقلبي بشكل خفيف عشان الرز ما يتكسر. وبعديها بشوي بتضيفي ماء ساخنه, لحد ما تغمر الرز.

الصوص اللي بضل, بتغمري الدجاج فيه وبتخلي الدجاج بالفرن تقريبا ساعه لحد ما يستوي. واذا ما كفى الصوص عادي اعملي واحد تاني بنفس المقادير.

بضلي تتفقدي الرز وبس تنشف الماء عنه بتحطي عليه زيت زيتون, او سمنه حسب اللي بتفضليه. وبتغطي بكيس بلاستيك لحد ما يستوي.

واذا زاد من الصوص ولو شوي حمسيه على النار لحد ما يطهى وخليه صوص عشان تأكليه مع الرز.

بتزيني باللوز. وهيك فينا نحكي, صحه وهنا.