حلقومة بالتشينة و التفاح أو طمينة التشينة كل واحد واش يسميها بصح روووعة ديري حبات تشينة، ابشري شوية قشور وخليها جانبا و الباقي قشريها زيديلها حبة و لا اثنين تفاح نحيلهم الزريعة (ازالة البزر) وقطيعهم بقشورهم ديريلهم شوية ماء وحطيهم يغليو حتى يطيبو و ينشف ماهم

ارحيهم بالبرا ميكسور (خلاط) امبعد صفيهم بالصفاية باش يتنحاو (للتخلص من) الزوايد و اذا تحبي تستغني على هذي الخطوة لازم ترحيهم مليح انت واش تحبي

بعدها عبري شحال تجيك هذيك التشينة ديري نفس العبر سكر مثلا اذا جاتك غرفية تاع شوربة تشينة ديري نفسو سكر وتحركيها مليح فوق النار.

كي تصبح هلامية و ما تتلاصقش في الاطراف نحيها من فوق النار و حطيلها مبشور البرتقال لي خليتيه و حطيها في مول السلكون و خليها تبات ليلة كاملة باش تقدري تنحيها من المول بسهولة و رمديهم في السكر و وبصحة و الهنا.السر هنا لازم تنشف من الماء ما تبقاش جارية باش تجمدلك مليح.

تقدري تستغناي على التفاح و ديري تشينة وحدها.