زي ما قلنا الكبدة تكون طازجة من الجزا,ر نبعد عن المثلجة عشان مافيش مقارنه من ناحية الطعم. وكمان المثلجة مشكوك في مصادرها, زي ما سمعنا كتير.

حاجة كمان, لو لاحظنا وجود الغشاء الرقيق اللي على سطح الكبدة من بره, نحاول نشده براحة ونشيله. عشان بعد التسويه مايديش صعوبة بسيطة في قضم الكبدة. دي كذا حاجة سمعتهم من شيف في التليفزيون ولقيتهم فرقوا فعلا في الطعم والتسوية. 😉

بنقطع الكبدة شرايح طويلة ورفيعة. وعشان نتحكم في تقطيع الكبدة كويس وماتتهريش في ايدنا, نخلي الجزار يقطعها. او ندخلها الثلاجة, او الفريزر, شويه تمسك نفسها عشان يبقى تقطيعها اسهل.

بنحط على الكبدة التوابل والليمون والخل والزيت والفلفل المفروم والثوم ونقلب كله كويس.

نقطع عليها قرون الفلفل, برضه شرايح طويله. ولو في فلفل الوان بيدي شكل جميل جداً للطبق. ونسيب الكبدة حوالي نص ساعة لساعة, تتبل في الثلاجة.

نجيب طاسة, يفضل مابيلزقش فيها الطعام. نحط معلقتين كبار زيت, مانكترش. ونسيبهم يسخنوا جامد على النار.

بعدين ننزل الكبدة ونسيبها على نار عالية دقائق ونقلبها تأخذ صدمة وتتلون من كل ناحية, نلاقي لونها اتغير. وبعدين نهدي عليها النار ونغطي عليها.

بتجيب الماء بتاعتها, مانزودش ليها ماء ابدا من بره. نسيبها حوالي ربع ساعة وبتكون استوت.

نديها تقليبه كل شويه, لحد ما نلاقيها شربت ميتها تاني وبقي حواليها صوص جميل. ولو احتاجت نزود ملح, حسب الرغبة طبعاً.

و اول ما نطفي عليها, نعصر عليها نصف ليمونة. ممكن نعمل جنبها طحينة وتتعمل سندوتشات, او تتغمس, او يتعمل جنبها معكرونة. وبتبقى في الاخر اكله جميلة جداً. وماخدتش وقت خالص ولا مجهود. بألف هنا. 🌺