الزبدة بندخلها الفريزر لغاية ما تجمد تماما و بعدين بنبشرها زي الصورة

هنحط الزبدة عالدقيق والسكر و الملح و الخميرة ونقلب بمعلقة خشب براحة مجرد تقليب مش عجن
مش عايزين نعجن الزبدة عايزينها تتخلط بس
ونعدي ايدينا فى الدقيق كده براحة لو فيه اى كلاكيع كبيرة كده نفرولها

اهو ده شكلها بعد ما اتخلطت

بعدين بقى نصب اللبن ونقلب بردو بالمعلقة براحة منعجنش لغاية ما هتلاقيها كتلت كده

اهو ده شكلها بعد ما قلبت اللبن

هشيل المعلقة الخشب بقى وابتدي المه بايدى وبردو مش هعجن انا هلمه بس لغاية ما يكون كورة عجين كده
هنا اول ما ابتديت المه بايدي

وهنا بعد ما اتلمت خالص اهي .. وكل ده انا معجنتهاش خالص انا مش عايزة الزبدة تتعجن عشان دي اللى هتعمل الطبقات وهتنفشه بعد كده

حطيتها فى كيس بقى اهو و هحطها فى التلاجة ساعتين

بعد الساعتين بقى نطلعها وعالرخامة نرش دقيق وعلى الوش عشان متلزقش لما نفردها

الحتة دي بقى مهمة اوي
فى الاول هنفردها يمين وشمال لغاية ما تطول بالعرض كده وهيبقى شكلها وحش فى الاول بس هتتعدل بعد كده
اهم حاجة منفردهاش فى كل حتة هو يمين وشمال الاول زي الصورة

وبعدين تحت وفوق لغاية ما تقريبا تبقى مستطيل كده سمكه بتاع نص سم

انا هنا جبت صورة بعد كذا خطوة بس عشان محطش صور كتير .. المهم بعد ما عملناها مستطيل هنحاول نقفلها زي الكتاب
هنقفل الجمب اليمين زي الصورة كده

وبعدين الجمب الشمال كأننا بنطبقهم ونحاول نقفل الاطراف مع بعضها براحة

نلفها

نطبق الجمب اليمين

نطبق الجمب الشمال و نحاول نشبك الاطراف فى بعضها

بعدين نقلبها على ضهرها

ونفردها تاني بردو وهكذا ...
الكام خطوة اللى فاتوا هيتعملوا 3 مرات
يعنى بنفرد المستطيل يمين شمال وفوق وتحت وبعدين نطبق يمين نطبق شمال نلفها ونطبق يمين ونطبق شمال ونقلبها على ضهرها ونفرد يبقى دي كده مرة وهنكررها 3 مرات
وفى اخر مرة بعد ما نقلبها على ضهرها مش هنفردها بقى .. لا هناخدها نشيلها فى كيس تانى ونحطها فى التلاجة تقريبا من ساعتين ونص ل 3 ساعات تانيين

بعد ما نخرجها من التلاجة هنفردها مستطيل تانى ونقطعها مثلثات طويلة كده بالسكينة

هناخد مثلث .. هنقطعه من النص من فوق كده حتة صغيرة زي الصورة وهنحط بقى اي حشو احنا عايزينوا سواء حلو او حادق
انا حشيته جبنة
و ممكن شيكولاتة او مربي او اي حاجة تيجي فى بالكوا بقى

هنبتدي نلف بقى

الحتة اللى فى الاخر دي هتبقى من تحت بقى عشان ميتفتحش لما ييجي يستوي

كده اهو

نكمل الباقى بقى ونرصهم فى صينية مدهونة خفيف اوي زيت وبعيد نسيبهم بقى فى اي حتة يخمروا بتاع ساعتين تلاتة تانيين

متحاولوش تجبروه يخمر .. يعنى متولعوش عليه فرن وتدفوه والكلام ده عشان الزبدة متخرجش منه سيبوه برحته وسيبوا مسافات

هنجيب صفار بيضة وعليه معلقة لبن و نضربهم كويس عشان ندهن بيها الوش

هندخله الفرن على حرارة 200 لمدة 10 دقايق كده وبعيدن نوطي الحرارة ل 150 5 دقايق كمان وبعدين نخرجه ونسيبه يبرد بقى براحته

هنا بعد ما استوي و برد
بالهنا والشفا