اول شي بنغسل المحاشي وبنكورهم وبنضع الباذنجان بالماء وبرش على فوقو ملح عشان المرار وبنجهز الرز وبنقلي البصل ممكن نضع اللحمة بحوسها مع البصل على الغاز والبهارات وممكن بدون حوس حسب شو بتحبو وكيف متعودين بنجهز الزر بنغسلو وبنصفيه وبنضع فوقو الرز الى ذبلناه والبقدونس والنعناع والبندوره المفرومه والبهارات والماجي وزيت الزيتون بعدها بنبلش نحشي المحاشي

وبنكون سالقين ورق الدوالي بالطريقه المعروفه وبنلفهم بالطريقه الى اكيد الكل بعرفها

بعد ما نكون حشينا المحاشي وورق الدوالي بنصفط المحاشي بطنجره وبنفرم على الخلاط بندوره مع ثوم وبنغلي ماء وبنملحهم وبنبهرهم وبنضع ماجي وبنغمرهم بالماء وبس يغلو غلوتين ثلاث بنضع ملعقه من رب البندورة وبنغطيهم وبنتركهم ليستو

ورق الدوالي بنكون لفيناه بنجيب طنجره وبنضع ريش خارف اذا بتحبو بنحوسهم على الغاز مع بصله وبهارات وقرفة وكاري وشويه زيت لحتى اللحمة توخد لون خفيف بعدها بنطفي الغاز وبنصفط شرحات بندوره وثوم وجزر اذا بنحب وبنضع الدوالي وبنرصهم وبنحط بهارات مشكله وملح وماجي وبنضع صحن فوقهم وبنضغط عليهم عشان يحافظ على شكلو وما يطلع الرز منهم وبنحط ثقل اي شي فوقهم وبنغمرهم بالماء المغليه بنتركهم يغلو غلوتين وبنخفف الغاز تحتيهم وبنتركهم ليستو على راحتهم

(اذا بتحبو تحطو رب بندوره على الدوالي حسب ما بتحبوه وممكن تضعو دبس رمان للحموضه)

اخر شي لما يستوي ورق العنب بنضع فوقهم فنجان زيت زيتون مع عصر حبه ليمون لاعطاء لمعه للورق وبنفس الوقت حموضه وصحتين وهنا