نخلط السميد مع الملح من بعد نلم بالماء حتى نتحصل على عجينة يابسة شوية من بعد نبقى نزيدلها في الماء ونعجن مليح حتى توليلي طرية بزاف وتتلاصق في اليد من بعد نخليها ترتاح نص ساعة هكيك ونبدا نطيب الديول.

نجيب مقلا جديدة خاصة بالبوراك يعني مطيبناش ولا قلينا فيها من قبل ونحطها على نار قليلة حتى تسخن مليح من بعد نحكم شوية من العجينة ونعقبها على المقلة كاملة ونرجع المقلة فوق النار القليلة ونعسها كي تتنحا الورقة من الاطراف نحي المقلة من النار ونجبد الورقة بكل سهولة ونحطها على سرفيثة.ونكمل كامل الكمية ونغطيها باش ماتيبسش.