نتبل الدجاج برش التوابل حسب كمية الدجاج انا تبلت بالعين برك وعصرة ليمون ونخليه مدة ساعتين في الثلاجة ولا كنا مش مزروبين بيه نخليه يبات ليلة كاملة

نحط الدجاج تاعنا في مول او مقلاة تدخل للفرن ونقليه في الزيت نحمرو خفيف برك ثم نزيدلو الخضر ونقليهم مليح ثم نزيد الماء نخليه يهز الغلية برك ونغطيه بورق الطبخ وندخلو الفرن يطيب (يستوي)نصف ساعة

مالازمش نخليه يطيب (يستوي)بزاف حتى نقدر نتحكم فيه نخليه يبرد بجهة ونرحي الخضر بالمكسور

نقطع البطاطا قطع خشينة شوي ونقليها نصف طياب ثم نحطها في صلصة الخضر لي كنت ميكسيتها وندخلها الفرن تتشرب الصلصة

نتبل الفرينة (طحين) والخبز ونجيب الدجاج لي يكون برد شوي ونحطو في الفرينة (طحين) ثم البيض ثم الخبز ونعاود نردها للبيض ثم الخبز نحطها في الثلاجة ربع ساعة

نقلي الدجاج في الزيت الساخن ونحمرو مليح ثم نقدمو وبالصحة والعافية

هذي طاولة الفطور تاعي