بنغسل الدجاج وانا بشيل الجلد قبل السلق بسلقن مع بصلة وبشيل الزفر وبحط معن عود قرفة كم حبة هيل وكبش قرنفل وكم حبة فلفل اسود يعني وسطيا من كلشي اربع حبات وورق غار ليستوي الدجاج

بفرم بصلة ناعمة و بقليا بشوية زيت نباتي يعني مقدار ثلث كوب زيت وبس تذبل ممكن اضافة فليفلة مفرومة ناعم و جزرة مبروشة و بضيف البندورة المبروشة او مضروبة على الخلاط

وبنزل البهارات بحط بهار كبسة مكعب ماجي ملح فلفل كاري فليفلة حدة وبضيف الرز المغسل و المنقوع تقريبا بنقعو نص ساعة و بقلبو معهن و بحط لكل كاسة رز كاسة و ربع مرقة الدجاج المسلوق وماء وبغطيه على نار هادية تقريبا ثلث ساعة ليستوي

بسكب الرز و بحط على الوجه الدجاج المسلوق او ممكن يتحمر الدجاج بالفرن (بعد ما غطسو بصلصة اللي هيه لبن و ملعقة صغيرة دبس بندورة و رشة بهار صغيرة و رشة كركم) وبنحطو بعد التحمير بالفرن فوق الرز

بمعلقة صغيرة زيت نباتي بقلي الزبيب او المكسرات و بحطا على الوجه والف صحة وهنا