نبدأ أولا بالعجين، نحضر كل المكونات ونسمي الله، في إناء نحط الماء والحليب بودرة مع الخميرة والسكر مع 2 ملاعق كبار فرينة نخلط الكل جيدا حتى تنسجم المكونات نغطي الإناء ونخلي الخليط يتفاعل مدة 10 دقائق.

كي ترتاح دير فقاقيع كثيفة نخلط شوية ونضيف زيت الزيتون والملح ونضيف خميرة الحلويات مع كمية من الفرينة ونخلط.

ونبدأ نلم لعجينة بيدي ونضيف الفرينة بالتدريج حتى نتحصل على القوام المطلوب يجي عجين طري ويلصقش شوية في اليد، نمسحها مسحة خفيفة بزبت الزيتون ونغطيها ببابي فيلم ومن فوق بقطعة قماش ونخليها تخمر على خاطرها.

في هاذ الأثناء نحضر الحشو، في مقلاة حطيت شوية زيت يسخن، رميت عليه البصلة المقطعة رقيق خليتها حتى ذبالت وضفت في طرف المقلاة الثوم مبشور قليتو شوية وخلطت الكل مع بعض ثم ضفت الجزر مبشور خلطت مليح وغلقت على المقلاة.

كي ذبالت الجزر ضفت كمية اللحم المفروم خلطت شوية ثم ضفت الطماطم المصبرة مع صلصة الباربيكيو و التوابل (الملح، الكركم، تابل الجبن، الفلفل الأحمر، الفلفل الأسود، تابل الشاورما).

قليتهم مليح مليح على نار هادئة ثم زدت حبة طماطم منقية من القشرة مقطعة قطع صغيرة خلطت الكل جيدا وغلقت على المقلاة.

وخليتها طيب (تستوي) وتنشف من الماء وكإضافة أخيرة زدت رشة من الزعتر او الزعيترة حسب المتوفر خلطت الكل جيدا وطفيت عليها، فرغتها في صحن واسع وخليتها تبرد لحين الإستعمال.

نولي للعجينة، صبتها خمرت ديقازيتها وقطعتها إلى قطع متساوية عطاتني 08 قطع (وزن كل حبة 75 غ) نكوّرهم مثلما هو موضح في الصور.

نقلي حبات البطاطا ونحطهم في الورق الماص ونرابي الجبن نبدأ بكرية الأولى نحلها رقيق على شكل مستطيل نحاول نرقق الأطراف ونحط كمية من الحشو ومن فوق كميةمن البطاطا المقلية.

ومن فوق نضيف كمية من الجبن المبشور (حسب المتوفر أنا استعملت نابولي)، نلم الأطراف كما هو مبين في الصور، ندهن الحواف بالماء ليسهل إلتحام العجين مع بعضه.

نعمرهم كامل بنفس الطريقة ونبدأ نطيبهم.

نطيبهم في الطاجين الثقيل ندهنو بالقليل من الزيت، نحطهم وقبل ما نقلب الحبة نمسحها ثاني بالقليل من الزيت أو الزبدة.

نطيبهم على كل الجهات ومرة على مرة نقلبها. نكمل الكمية بنفس الطريقة بلا ما ننسى الأطراف حتى هما نحمروهم.

وقدّمتهم بألف صحة وهنا 😋👌🏻😋

يجيو فارغين من الداخل وبزاف بنان ولعجينة طرية👌🏻😋👌🏻. وشهية طيبة للجميع 🥰