نبدا بسم الله ونحضر المكونات ونحضر العجين تاعي نجيب صحن من الاينوكس ونحط كاس حليب دافي ونصف كاس ماء دافي ونحط عليهم م ك سكر وم ك خميرة الخبز ونخلطهم ونخليهم يتفاعلو 10د ثم نضيف 4م ك زيت وبياض بيضة ونخلط ثم نبدا باضافة الفرينة حتى نتحصل على عجينة طرية نحطها على طاولة العمل ونضيفلها م ك زبدة وندخلها فيها مليح

نحط العجين تاعي فللصحن ونخليه يختمر مليح ووبعد الاختمار نهبطلها الخمور ونحطها على طاولة العمل وتقصها بالسكين الى 15،قطعة

نشكل العجينة كرات ونجيب الجبن تاعي ونحل كل كرة قليلا ونحط فيها قطعة جبن ونغلقها مليح ونشكلها كرية ونجيب سينية الفرن نحط عليها ورق طهي ونبدا نحل كل كرة قليلا ونحطها فالسينية حتى نكمل كامل الكمية

بعد ماكملت كامل الكرات نجيب صفار البيض ونضيف عليه قليل من الحليب وندهن الكرات تاعي مليح ونبدا نزينو بالزيتون الاخضر ثم نرش عليه سينوج ونسخن الفرن ونحط السينيات يطيبو

فالاخير نخرج الخبز تاعي من الفرن ونحطو ونغطيه ونخليه يبرد لحين التقديم