نبدا بسم الله ونحضر أولا الشاورما نجيب نصف صدر دجاج نغسلو مليح ثم نقطع الى قطع ونحطو في صحن نضيف عليه م ك موطارد وعلبة ياؤورت طبيعي نحط زنجبيل وفلفل اسود وتوابل شاورما وثوم بودرة وقليل من العكري الحلو والزيت ونخلط مليح

الان نحضر خبز الكرواصون لي راح نرافقو مع الشاورما نجيب ريسبسيون نحط فيها علبة ياؤورت طبيعي وبنفس العلبة نعمرها حليب دافئ ونحط م ك سكر وم ك خميرة الخبز وبياض بيضة وعلبة الاربع زيت ونخلط الكل مليح ثم نبدا نضيف الفرينة تدريجيا

نضيف الفرينة وم ص ملح ونلم العجينة مليح حتى نتحصل على عجينة طرية نلمها ونغطيها بورق شفاف ونخليها تختمر

بعد مااختمرت العجينة نرش سطح العمل بالفرينة ونحل العجينة على شكل مستطيل ونجيب جرارة ونقص مثلثات متساوية ونجيب مول كيما فالصورة ندهنو بالزبدة ونرشو بالفرينةمليخ ونبدا نشكل حبات الكرواصون ونحط فالمول

نكمل كامل العجينة ونغطيها ونخليها تختمر حتى ينضاعف حجمهم بعد مااختمرت نجيب صفار البيضة نضيفل. الحليب وندهن حبات الكرواصون ونزينها بسينوح ونشعل الفرن يسخن مليح و ندخلها تطيب من تحت ثم نشعللها من فوق تتحمر

نرجع بعد ذلك الشاورما نطيبها نجيب مقلاة نحط فيها القليل من الزيت ونحطها عالنار تسخن ونفرغ الشاورما تاعي ونخليها تطيب على نار قاوية

بعد ماطابت خبزة الكرواصون نخرجها من الفرن وننزعها من المول ونخليها تبرد

نرجع نقلي حبة بطاطا ونجيب صحن التقديم نحط فيه الخبزة جاء شكلها هايل ونجيب الشاورما بعد ماطابت ونفرغها فالوسط ونضيفلها البطاطا المقلية ونزينها بمايوناز شرائح بصل

فالاخير شكل الطبق تاعي جاء هايل وين بزاف وفعلا طبق بريستيج يصلح الشهر الفضيل ونجيب سكين منشاري ونقطع الحبات ونعمرها بالشاورما