نحضر كل المكونات ونبدا على بركة الله، في إناء نفرغ علبة الزبادي ونضيف عليها مركز عطر الفراولة والحليب المجفف ونفرغ عليها نص لتر حليب ونخلط الكل جيداً ونخليها بجيه.

نفرغ باقي الحليب في طنجرة ونضيف عليه السكر، نحرك مليح ونحطها فوق النار مع التحريك المستمر على نار متوسطة كي تبدا تغلي وتبغي تفيض نقص عليها نخليها على نار هادية مع التحريك المستمر.

نحسب 5 دقائق بعد الغليان ونطفي عليه ونخليه شوية يهدا ونضيفو على الخليط البارد.

حركت مليح بالسباتول حتى انسجمت كل المكونات، نصفيه ونخليه حتى يولي دافي (كي ندخل صبعي فيه نقدر نتحمل الحرارة نتاعو).

نفرغ خليط الياغورت في علب زجاجية من الأحسن يكون عندهم غطاء، هاذ الكمية عطاتني عشرة (10) حصص حجم صغير.

غلقت عليهم، حطيتهم في علبة كبيرة مفرشة بسربيتة (قطعة قماش) وزدت غلقت العلبة الكبيرة، لفيت العلبة الكبيرة مليح بكوفيرتة (بطانية) دافية وحطيتها في مكان دافي مدة 12 ساعة أو ليلة كاملة (سخنت الفرن مدة 10 دقائق وطفيت عليه دخلت العلبة للفرن).

كي فاتت مدة 12 ساعة صبتهم جمدو غاية دخلتهم للثلاجة لحين الإستهلاك (خليتهم تقريبا 5 ساعات في الثلاجة) باش بردو مليح.
ملاحظة مهمة: ✔حضرت الزبادي في الليل.

في هاذ الوقت حضرت مربى أو فوراج الفراولة في كسرونة حطيت 300 غ فراولة مع 150 غ سكر خلطتهم وغطيتهم وخليتهم تقريبا ساعة (حتى ذاب السكر تماما وطلق الماء)، فرغتهم في كاسرونة وضفت عليهم شريحة ليمون وحطيتهم فوق النار تكون متوسطة كي بدا يغلي نحسب 10 دقائق نحي الرغوة من حين لآخر، ثم ضفت علبة الفلان مع نص كاس ماء دافيء وخليتو حتى غلى مع التحريك، نخليه يبرد ونفرغو في علبة زجاجية أو برطمان معقم، يتم الإحتفاظ به في الثلاجة لحين الاستعمال.

فرغت حوالى ملعقة كبيرة في علبة الياغورت، نص خليتو بدون إضافات، ووقدّمتـــو بألف صحة وهنا🍓👌🏻😋

بزاف بنين، الحلاوة نتوما تتحكمو فيها أنا استعملت 3 مغارف كبار سكر مجاش حلو بزاف، القوام جا كريمي وفي نفس الوقت حاكم روحو وشهية طيبة للجميع 🥰