نحضر كل المكونات ونبدا على بركة الله، في إناء نفرغ علبة الزبادي ونضيف عليها توبينغ المشمش يمكن تعويضه بقطرات من مركز عطر المشمش ونفرغ عليه كاس حليب ونخلط الكل جيداً ونخليها بجيه.
ملاحظة:✔ استعملت حليب كونديا.

نفرغ باقي الحليب في طنجرة ونضيف عليه السكر، نحرك مليح حتى يذوب السكر.

ونحطها فوق النار مع التحريك المستمر على نار متوسطة كي تبدا تغلي وتبغي تفيض نقص عليها نخليها على نار هادية مع التحريك المستمر. نحسب 5 دقائق بعد الغليان ونطفي عليه ونخليه شوية يهدا يدير طبقة من فوق نحاول ننزعها.

كي يدي حرارة الجسم (كي ندخل صبعي فيه نقدر نتحمل الحرارة نتاعو) نضيف عليه الخليط الأول وحركت مليح بالسباتول حتى انسجمت كل المكونات.

نفرغ خليط الياغورت في كؤوس زجاجية كما هو موضح في الصورة، هاذ الكمية عطاتني عشرة (10) حصص حجم صغير.

بما أنني استعملت كؤوس غطيتهم بقطع من ورق الماص حسب ما هو موضح في الصور.

كي غلقت عليهم، حطيتهم في علبة كبيرة مفرشة بسربيتة (قطعة قماش) وزدت غلقت العلبة الكبيرة، لفيتها مليح بكوفيرتة (بطانية) دافية وحطيتها في مكان دافي مدة 12 ساعة أو ليلة كاملة (سخنت الفرن مدة 10 دقائق وطفيت عليه دخلت العلبة للفرن).

كي فاتت مدة 12 ساعة صبتهم جمدو غاية دخلتهم للثلاجة لحين الإستهلاك (خليتهم تقريبا 5 ساعات في الثلاجة) باش بردو مليح.
ملاحظة مهمة: ✔حضرت الزبادي في الليل.

قوام حاكم روحو وفي نفس الوقت كريمي.

في هاذ الوقت ديت 2 ملاعق كبار من مربى أو فوراج المشمش كنت 👈🏻حطيت الوصفة بالتفصيل يمكن تفقد الطريقة من خلال هذا الرابط 👇🏻 وميكسيتهم وفرغت مقدار ملعقة صغيرة ونص في خمس كؤوس فقط والباقي خليتهم بدون إضافة.

وقدّمتـــو بألف صحة وهنا 🍑👌🏻🍑

بزاف بنين، الحلاوة نتوما تتحكمو فيها أنا استعملت 3 مغارف كبار سكر مجاش حلو بزاف، القوام جا كريمي وفي نفس الوقت حاكم روحو وشهية طيبة للجميع 🥰