نوجد كل المكونات ونبدأ على بركة الله، في إناء نضع المارغرين وحبة البيض ورشة ملح نخلطهم جيداً بالمضرب اليدوي (الفوي) حتى نتحصل على خليط متجانس.
ملاحظة: ✔استعملت مارغرين أوبلين
✔ الكاس اللي عبرت بيه سعته 200 ملل

ثم ضفت السكر حبيبات (استعملت يدي لأنو المارغرين كانت شوية باردة) ثم ضفت الفانيلا وخلطت الكل جيدا.

ثم ضفت الزيت بالتدريج مع الخلط المستمر حتى تحصلت على خليط كريمي، في الأخير ضفت النواشف (الفرينة والنشاء وخمارة الحلويات) نغربلهم أكيد.
ملاحظة: ✔ ما نحطش كل كمية الفرينة، في الأول حطيت 2 كيسان ومن بعد ضفت نصف كاس بالتدريج.

خلطت النواشف حتى تحصلت على عجينة مرملة وطرية مثل الصابلي،قسمت العجينة على إثنين.
ملاحظة مهمة: ✔حبة البيض اللي استعملتها صغيرة علابيها دات معايا زوج كيسان ونصف فرينة.

واحدة نخليها بيضاء والثانية ضفت لها ملعقة كبيرة كاكاو بني مر مع مركز عطر الشوكولا ندخلها مليح مليح حتى تتجانس العجينة وتولي طرية.
ملاحظة مهمة: ✔يمكن إضافة قطرات من الزيت إذا شفتو العجينة اللي فيها الكاكاو شوية ناشفة.

نغلفها بكيس بلاستيكي ونخليها ترتاح مدة 15دقيقة، ثم نشكلها كويرات متساوية وتكون صغيرة الحجم (وزن كل كرية 3 غ)، كنت استعملت نفس طريقة بسكوي شوكو فاني👈🏻 يمكن تفقد الوصفة من خلال هذا الرابط👇🏻

نروح للتشكيل: نحط كرية بنية في الوسط وندوّر عليها 5 كريات بيضاء ثم نستف بالتناوب حبة بيضاء مع حبة بنية (6 حبات بنية مع 10 حبات بيضاء) ونلمهم (كما هو موضح في الفيديو) ونضغط عليهم برفق باستعمال الحلال، عند الضغط تأخذ تلقائيا شكل الكورة⚽.

قطعتها بالكاس كما هو موضح في الفيديو شكلها جا بزاف شباب.

بنفس الطريقة درت اللون البني (كرية بيضاء في الوسط وندوّر عليها 5 كريات بنية ثم نستف بالتناوب حبة بيضاء مع حبة بنية (6 حبات بيضاء مع 10 حبات بنية) ونلمهم نحل شوية بالحلال ونقطع بالكاس (حجم متوسط).

نحطها في صينية فيها سلكون خاص بالطهي أو ورق زبدة، ندخلها للفرن المسخن مسبقا على نار متوسطة مدة 20 دقيقة تقريبا، حمرتها شوية لأني نحب الكوكيز محمر يمد تقرميشة رائعة، كي طيب نحطها على مشبك باش تبرد.

ويقدّم بألف صحة وهنا😋⚽😋.

شكلو جا شباب👌🏻 والبنة ما نحكيلكمش😋، طارو بيهم في بلاصتهم ههههه😉 بصحتهم وشهية طيبة للجميع⚽🥰⚽